Kitab sərgisinə ödənişsiz avtobuslar təşkil olunacaq

Kitab həvəskarlarının Bakı Ekspo Mərkəzinə xüsusi avtobuslarla gediş-gəlişi təmin ediləcək.

TodayPress TV xəbər verir ki, Azərbaycan Respublikası Mədəniyyət Nazirliyinin təşkilatçılığı ilə oktyabrın 1-də Bakı Ekspo Mərkəzində XI Bakı Beynəlxalq Kitab Sərgisi başlanır.

Sərgi oktyabrın 7-dək davam edəcək və bu il “Texno-insan: dünənin əfsanəsi, bu günün hadisəsi” mövzusuna həsr olunub.

Kitabsevərlərin sərgiyə rahat gediş-gəlişi üçün xüsusi avtobuslar təklif olunacaq. Sərgidə iştirak etmək istəyənlər, metronun “Elmlər Akademiyası” (09:00 - 17:00), “28 May” (09:00 - 17:30) və “Koroğlu” (09:00 - 18:00) stansiyalarından Bakı Ekspo Mərkəzinə sərbəst şəkildə gedib-gələ biləcəklər.

Avtobusların Bakı Ekspo Mərkəzinə yola düşmə və geri dönüş cədvəli ilə bağlı məlumatlar təqdim ediləcəkdir. Bu təşəbbüs sərgiyə getmək istəyənlər üçün rahat və effektiv nəqliyyat imkanı yaradacaq.

Sərgidə yerli və beynəlxalq nəşriyyatlar, kitabxanalar, yazıçılar və müxtəlif mədəniyyət təşkilatları iştirak edəcək, bu da tədbirin daha da maraqlı və zəngin olacağına işarə edir.

Qeyd edək ki, kitabsevərlər, bu unikal tədbirə qatılaraq ən yeni nəşrlərlə tanış ola, yazıçılarla görüşlər keçirə və müxtəlif mədəniyyət tədbirlərində iştirak edə biləcəklər.

TodayPress TV