Təzyiq pik həddə çatır: Putin “nüvə kartı”nı işə salacaq?
Avropa İttifaqı (Aİ) ölkələri oktyabrın 23-də Rusiyaya qarşı 19-cu sanksiyalar paketini rəsmən təsdiqləyib.
“19-cu paket digər ölkələrin bayraqları altında Rusiya neftini daşıyan 100-dən çox tankerə qarşı məhdudiyyətləri əhatə edir. Paket çərçivəsində həmçinin Rusiya mayeləşdirilmiş təbii qazının (LNG) ixracına qadağa qoyulub”, - Aİ Şurasının məlumatında deyilir.
Sanksiyalar sərtləşdikcə dünyada narahatlıq artır. Düşünülür ki, Rusiya Prezidenti Vladimir Putin sanksiyalara nüvə silahını işə salmaqla cavab verə bilər.
Maraqlıdır, Rusiya rəhbəri mövcud şəraitdə belə bir qərar verə bilər?
Məsələ ilə bağlı TodayPress TV-yə danışan politoloq Bakir Həsənbəyli bildirib ki, Rusiya–Ukrayna müharibəsi İkinci Dünya müharibəsindən sonra təchizat zəncirinin qırılmasına səbəb olan yeganə münaqişə kimi tarixə düşüb.
Müharibənin başlamasından 3 il 9 ay keçməsinə baxmayaraq, Kreml neoimperialist siyasətini həyata keçirə bilmir. Bu, Putin administrasiyasının daha da aqressivləşməsinə səbəb olur və həmin aqressivlik artıq ritorikada özünü göstərir.
“Məğlubedilməz ordu” mifi dağıldı
Ekspertin sözlərinə görə, Putin və onun komandası artıq bu müharibədə qalib gələ bilməyəcəklərini anlayıblar:
“Artıq “məğlubedilməz rus ordusu” mifi tarixə qovuşub. Nəzərdə tutulan 72 saatlıq hərbi əməliyyat planı tam uğursuzluqla nəticələnib. Rusiya bu müharibə kontekstində heç vaxt olmadığı qədər təklənib. 19 sanksiya paketi, yüz milyardlarla dolların dondurulması, tank ehtiyatının 19 faizinin, hərbi avtomobillərin 16 faizinin, raket arsenalının isə cəmi 19 faizinin qalması Moskvanı çıxılmaz vəziyyətə salıb. Rusiya artıq hədə-qorxu taktikasından başqa çıxış yolu görmür”.
“Bu, hikkə müharibəsidir”
Bakir Həsənbəylinin fikrincə, Ukrayna müharibəsi əslində dövlətin deyil, bir şəxsin – Putinin şəxsi ambisiyasının nəticəsidir:
“Bu, bir nəfərin hikkə hekayəsidir. Putinin inadkarlığı Rusiyanın ehtiyat valyutasının 65 faizindən çoxunun xərclənməsi ilə nəticələnib. Rusiya hər gün döyüşlərə təxminən 372 milyon dollar xərcləyir. O bilir ki, nə vaxtsa xalq qarşısında bunun hesabatını verməli olacaq”.
"Nüvə təhdidləri real deyil"
Ekspert əlavə edib ki, Kreml rəsmilərinin, xüsusilə Medvedyevin nüvə silahı ilə bağlı bəyanatları artıq dünya ictimaiyyəti tərəfindən ciddiyə alınmır. Rusiya nüvə silahına sahib olsa da, onun faktiki tətbiq imkanlarına malik deyil. Putin çox yaxşı bilir ki, bu addımın nəticələri Rusiyanın özü üçün daha dağıdıcı olacaq.
Qiymət Mahir
