Regionda formalaşan sülhün hansı iqtisadi dividentləri var? - Millət vəkili AÇIQLANDI
"Gələn həftə Şanlı Zəfərimizin 5-ci ili qeyd olunacaq. Müzəffər Ali Baş Komandan cənab İlham Əliyev rəhbərliyi ilə güclü xalq-iqtidar birliyi Zəfərə çatmağımızda əsas şərtlərindən oldu. Vətən savaşında qazandığımız Zəfər Azərbaycanın ərazi bütövüyünün və suverenliyinin bərpasına imkan verdi və uzun müddət işğal altında qalan torpaqlarımız azadlığa qovuşdu".
TodayPress TV xəbər verir ki, Millət vəkili Vüqar Bayramov bu fikirləri öz "Facebook" hesabında yazıb.
O, zəfərimiz nəticəsində regionda formalaşan sülhün iqtisadi dividentlərinə diqqət çəkib:
"Müzəffər Ali Baş Komandanın rəhbərliyi ilə Azərbaycan Ordusunun əldə etdiyi zəfərdən sonra Cənubi Qafqazda formalaşan yeni düzən Azərbaycanın ərazi bütövlüyü və tam suverenliyi çərçivəsində anlaşmanın əldə edilməsinə imkan yaratdı. Şanlı Zəfərimizin regiona gətirdiyi sülhün starteji, siyasi və təhlükəsizlik aspektləri ilə yanaşı iqtisadi təsirləri də az deyil. Bir müddət öncə “Moody’s” beynəlxalq reytinq agentliyinin qeyd etdiyi kimi, anlaşma regional sabitliyi ilə bağlı narahatlıqları aradan qaldıra və inkişaf yönümlü impulsları, eləcə də xarici sərmayə marağını stimullaşdıra bilər. Qafqazdakı sülh Azərbaycanın müxtəlif sahələrdə iqtisadi inkişafını daha da dəstəkləyə bilər. Belə ki, sülhün regionda daha çox sərmayənin cəlb edilməsinə imkan yaradacağı gözlənilir. Xarici investorlar sülhün əldə edildiyi Qafqaza sərmayə qoyluşlarında daha maraqlı olacaqlar".
Parlamentari vurğulayıb ki, uzun müddət regiona sərmayənin cəlb edilməsinə təsir göstərən faktorlardan biri də konfliktlər olub:
"Azərbaycan Prezidentinin yeni dövrünün yeni hədəflərinə uyğun olaraq qeyri neft-qaz sektoruna daha çox sərmayənin cəlb edilməsi əsas prioritetlərdən biridir. O istiqamətdə də aparıcı ölkələr ilə əməkdaşlığın gücləndirilməsi, daha çox sərmayənin cəlbi istiqamətində işlər həyata keçirilir. Gözlənilir ki, sülh müqaviləsindən sonra xüsusən inkişaf etmiş ölkələr tərəfindən regionda daha çox sərmayənin cəlbinə şərait yaradılacaq.
Digər tərəfdən, Azərbaycan və Ermənistan arasında əlaqələrin yenidən bərpası və Zəngəzur dəhlizinin istifadəyə verilməsi bütövlükdə region üçün yeni inkişaf imkanları demək olacaq. Zəngəzur dəhlizi həm Şimal-Cənub, həm də Qərb-Şərq nəqliyyat dəhlizlərinə inteqrasiya oluna biləcək. Bu da nəticə etibarilə yeni dəhlizlərin və yeni layihələrin reallaşması üçün bir zəmin yaradır. O baxımdan Zəngəzur dəhlizi Azərbaycan üzərindən daha çox yüklərin daşınması və bütövlükdə, regionun iqtisadi fayda götürməsi üçün mühüm bir imkandır. Çünki Zəngəzur dəhlizinin istifadəyə verilməsi Azərbaycan üzərindən illik olaraq təxminən 35 milyon ton yükün daşınmasına imkan verə bilər. Bu da Azərbaycanı beynəxalq yükdaşımalarda regional haba çevrəcək".
Deputat sonda qeyd edib ki, bütövlükdə, Azərbaycanın əldə etdiyi Zəfər daha stabil və inkişaf etmiş Qafqaza nail olunmasında vacib addım olub.
Nicat Osman
