Ramiz Yunus: "Ukrayna Qərbin şərəfini xilas edir"

"ABŞ Prezidenti Donald Tramp ilə Ukrayna lideri Volodimir Zelenski və onunla birlikdə gələn dəstək qrupu – NATO Baş katibi və Avropanın aparıcı ölkələrinin liderləri arasında keçirilən görüşün həm üstünlükləri, həm də müəyyən çatışmazlıqları mövcuddur".

TodayPress TV xəbər verir ki, Xəzər Universitetinin siyasi elmlər üzrə professoru Ramiz Yunus bunu öz "Facebook" hesabında yazıb.

O, ilk növbədə görüşün müsbət tərəflərinə nəzər yetirib: 

"Bu, şübhəsiz ki, Zelenskinin böyük diplomatik uğurudur. Çünki həm Rusiyanın, həm də Qərbdəki tərəfdarlarının bütün səylərinə baxmayaraq, o, öz inadkarlığı və sınmaz iradəsi ilə Qərbin əsas liderlərini bir masa arxasında toplamağı bacardı. Və bunu da haradasa yox, məhz Ağ Evdə etdi. Beləliklə, yeni bir “Münhen sazişi”nin imzalanmasının qarşısını aldı".

Professor, eyni zamanda görüşün mənfi məqamlarına da toxunub:

"Ağ Evdə bir araya gələn, özlərini “azad dünyanın” liderləri adlandıran siyasətçilər 60 trilyon dollardan çox ümumi daxili məhsula (ÜDM) malik olsalar da, cəmi 2 trilyon dollarlıq iqtisadi gücə sahib olan bir aqressorla bağlı problemi həll etməkdə çətinlik çəkirlər. Onların hamısı ABŞ prezidentilə ünsiyyətdə ehtiyatla davranır, fikirlərini ölçüb-biçərək ifadə edirlər – istər Ukraynaya dəstək məsələsində Vaşinqtonun qeyri-səmimi mövqeyinə, istərsə də Rusiyanın Ukraynaya qarşı uzun illərdir apardığı genişmiqyaslı təcavüz siyasəti qarşısında özlərinin zəif və qərarsız duruşuna münasibətdə. Bəs hanı beynəlxalq hüquq, suverenlik, ərazi bütövlüyü prinsipləri? Bəs necə oldu o ideallar ki, bir vaxtlar postsovet məkanında, o cümlədən Ukraynada xalqlar bu dəyərlər uğrunda barikadalara çıxmışdılar? Məgər anlamırsınız ki, aqressor qarşısındakı qorxaqlığınız və onu dilə tutmaq siyasətinizlə siz təkcə postsovet məkanındakıları deyil, vaxtilə sizə inanmış hər kəsi satırsınız?".

Analitik Ağ Evdə bir masa arxasında toplaşmış Qərb liderləri arasında Uinston Çörçill səviyyəsində siyasi iradə sahibi bir liderin olmamasından təəssüf hissi keçirdiyini də vurğulayıb: 

"Bu missiyanı üzərinə götürən şəxs isə Zelenski oldu. O, 3,5 ildən sonra nəhayət ki, bu liderləri Ağ Evdə bir araya gətirə bildi və bu gün məhz Ukrayna prezidenti açıq şəkildə Qərbin şərəfini xilas edir. Ümid edirəm ki, ABŞ prezidenti və Avropa liderləri bu imkanı əldən verməyəcəklər, çünki Avropa İttifaqı və NATO-nun gələcəyi hazırda məhz Ukraynada müəyyən olunur”. 

Sonda Ramiz Yunus böyük yazıçı Uilyam Şekspirin məşhur sözlərini xatırladıb:

“Kimdə qətiyyətli iradə yoxdursa, onda ağıl da yoxdur”.

Qiymət Mahir