NATO-nun 4-cü maddəsi işə düşür? - ŞƏRH
“NATO-nun 4-cü maddəsi üzrə məsləhətləşmələrin real hərbi müdaxiləyə çevrilmə ehtimalı yoxdur”.
Politoloq Rəşad Bayramov bunu TodayPress TV-yə açıqlamasında bildirib.
O vurğulayıb ki, Rusiya dronlarının Polşanın hava məkanına keçməsi faktdır və Rusiya tərəfinin bütün inkarlarına baxmayaraq bunu danmaq mümkün deyil. Rəsmi Moskva və Kremldən gələn direktivlərlə hərəkət edən Rusiya KİV-ləri və ekspertləri yenə də ənənəvi olaraq baş verənlərə görə üzr istəmək əvəzinə məsuliyyəti çiyinlərindən ataraq həmin dronların Rusiyaya məxsus olması faktını inkar edirlər.
“Rusiyanın faktı inkar etməsi anlaşılmazdır”
Analitikin sözlərinə görə, bu dronların Rusiya-Belarus hərbi təlimləri zamanı Polşa ərazisinə keçdiyinə dair də məlumatlar var və Belarus tərəfi artıq bununla bağlı açıqlama verib. Bildirib ki, təlimlərin gedişində bir neçə pilotsuz uçuş aparatına nəzarət itirilib və bununla bağlı Polşa və Litvaya məlumat verilib. Belə olan halda isə Rusiyanın yenə də faktı inkar etməsi anlaşılmazdır.
“ABŞ tərəfindən Rusiyaya yetərli təzyiqin olmaması fonunda Rusiyanın hansısa formada yumşaldılması mümkündür. Amma artıq 3 ildən çoxdur ki, Ukrayna bataqlığında ilişib qalan, imkanları tükənmiş, texnika və silah üçün Şimali Koreya, Çin və İran kimi ölkələrə müraciət edən, Şimali Koreyadan əsgər gətirmək məcburiyyətində qalan bir ölkənin indi özünə qarşı ikinci cəbhə açması faktiki olaraq mümkünsüzdür”, - o bildirib.
“Rusiya ilə sərhəddə olan NATO dövlətlərinin müdafiəsi həmişə olduğundan daha çox vacibdir”.
Siyasi şərhçi, həmçinin diqqətə çatdırıb ki, Polşa bir NATO ölkəsidir və ikinci cəbhənin məhz NATO üzvü olan bir ölkəyə açılması da Rusiyanın NATO-nu qarşısına alması deməkdir. Lakin faktın hansısa səbəbdən baş verməsindən asılı olmayaraq, Polşa tərəfi öz narahatlığında və NATO-nun 4-cü maddəsi üzrə məsləhətləşmələr tələb etməkdə tamamilə haqlıdır.
Onun sözlərinə görə, ayrı-ayrı NATO ölkələri artıq baş vermiş hadisənin hücum aktı olaraq qiymətləndirilməsinə qarşı olduqlarını bəyan ediblər. Amma buna baxmayaraq, Polşanın, o cümlədən Rusiya ilə sərhəddə olan NATO dövlətlərinin müdafiəsi indi həmişə olduğundan daha çox vacibdir.
"Rusiya yalnız güc dilini başa düşür”
"Məsləhətləşmələr zamanı bu ölkələr Rusiyadan ehtimal olunan təcavüzə qarşı Rusiya sərhədlərinə daha çox NATO qoşunlarının cəmləşdirilməsi, hava hücumundan müdafiə sistemlərinin gücləndirilməsi, uzaqmənzilli raket sistemlərinin yerləşdirilməsi kimi tədbirlər gündəmə gətirilə bilər. Eyni zamanda, Rusiya tərəfinə növbəti hərbi hərəkət zamanı sərt cavab tədbirlərinin görüləcəyi aydın şəkildə çatdırılmalıdır. Çünki hazırkı mərhələdə Rusiya yalnız güc dilini başa düşür. Bu səbəbdən, faktiki hərbi əməliyyatlar olmasa belə, həmin gücün nümayiş etdirilməsinə ehtiyac var”, - deyə R.Bayramov fikrini yekunlaşdırıb.
Qeyd edək ki, Polşa Baş naziri Donald Tusk ölkənin II Dünya Müharibəsindən bu yana ən sərt təhlükə ilə üz-üzə olduğunu bildirib. Belə ki, Rusiya dronlarının Polşa hava məkanına təmasları nəticəsində gecə 19 dron keçirilmiş, bəziləri vurulmuş və qalıqları aşkar edilmişdir. Polşa rəsmi olaraq NATO-nun 4-cü maddəsi üzrə məsləhətləşmələr tələb edib.
Aysel Mətləb
FOTOLAR
