Əbu-Dabidən Vaşinqtona: Sülhün müəllifi Azərbaycandır!

“Amerika Birləşmiş Ştatlarının Prezidenti Donald Trampın iştirakı ilə Azərbaycan və Ermənistan liderləri arasında keçiriləcək görüş müstəsna əhəmiyyətə malikdir və bu görüşdən müsbət nəticələr gözləmək mümkündür”.

Politoloq İlyas Hüseynov bunu TodayPress TV-yə açıqlamasında deyib. 

O, qeyd edib ki, mövcud geosiyasi reallıqlar fonunda ABŞ Cənubi Qafqaz regionuna xüsusi diqqətlə yanaşır və biz əvvəlki illərdə də Donald Trampın geosiyasi strategiyasında Cənubi Qafqazın mühüm prioritetlərdən biri olduğunu müşahidə etmişik:

“Azərbaycan Prezident İlham Əliyevin Donald Tramp prezident seçildikdən və vəzifəsinin icrasına başladıqdan sonra ünvanladığı məktubda iqtisadi, siyasi, təhlükəsizlik və enerji sahələrində əməkdaşlıqda yeni mərhələnin başlanacağına dair ümid açıq şəkildə hiss olunurdu. Trampın yeni hakimiyyəti dövründə Azərbaycan–ABŞ münasibətlərində dinamika və yanaşma baxımından fərqli çalarlar müşahidə olunur və bu dövr bizim üçün əvvəlki administrasiyadan əhəmiyyətli dərəcədə fərqlənir. Çünki Bayden–Blinken cütlüyünün Cənubi Qafqazda sülhə, təhlükəsizliyə, sabitliyə və dayanıqlı inkişafa ciddi zərbələr vurduğunun şahidiyik.

Hazırkı mərhələdə isə vəziyyət əhəmiyyətli dərəcədə dəyişib. Xatırladım ki, Prezident İlham Əliyevin Xankəndidə keçirilən III Şuşa Qlobal Media Forumunda səsləndirdiyi fikirlər Donald Trampın sosial media hesabında paylaşılmışdı. Bu, Azərbaycan–ABŞ ikitərəfli siyasi gündəliyini əhatə etməklə yanaşı, həm də Cənubi Qafqazda dayanıqlı inkişafa yönəlmiş mesajlar idi”.

Siyasətçi düşünür ki, Vaşinqtonda keçiriləcək görüş səmərəli nəticələr verəcək. Onun sözlərinə görə, görüşdə Azərbaycan, həm də Ermənistanla ABŞ arasında siyasi gündəliyin əsas istiqamətlərinin müzakirə olunacağı, eyni zamanda hazırda davam edən sülh sazişinin imzalanması ilə bağlı danışıqların intensivləşdirilməsi gözlənilir.

İ.Hüseynov iyulun 10-da baş tutan Əbu-Dabi görüşünü xatırladıb:

“Bu istiqamətdə indiyədək baş tutmuş ən mühüm danışıqlardan biri Birləşmiş Ərəb Əmirliklərinin paytaxtı Əbu-Dabidə keçirilən və olduqca konstruktiv atmosferdə yadda qalan görüş olub. İndi isə Vaşinqtondakı görüşü ali səviyyəli və nəticəyönlü danışıqlar mərhələsi kimi qiymətləndirmək olar. Çünki bu dəfə Zəngəzur dəhlizinin gələcəyi ilə bağlı məsələlərin də masa üzərinə qoyulacağı gözlənilir.

Ümid edirik ki, milli maraqlarımız kontekstində bütün məsələlər öz həllini tapacaq. Azərbaycan yeni geosiyasi reallıqlar fonunda bu danışıqlarda sülhün təşəbbüskarı və müəllifi qismində çıxış edir. Bizim üçün bu görüşü substantiv nəticələr doğuracaq strateji mərhələ kimi dəyərləndirmək olduqca vacibdir”.

Qeyd edək ki, Azərbaycan Prezidenti İlham Əliyev və Ermənistanın Baş Naziri Nikol Paşinyan Amerika Birləşmiş Ştatlarında (ABŞ) rəsmi səfərdədirlər. Bakı vaxtı ilə 22:30-da rəsmi görüşlər başlayacaq. 

Qiymət Mahir