Bu əmək haqları artırılır - İDDİA
Azərbaycanda minimum əməkhaqqının artırılması ilə bağlı gözləntilər güclənib.
TodayPress TV xəbər verir ki, mövzu ilə bağlı Milli Məclisin deputatı Vüqar Bayramov “Əmək Məcəlləsi”nə edilən dəyişikliklərə əsasən minimum əməkhaqqının məbləğinə ildə ən azı bir dəfə baxılacağını bildirib.
Onun sözlərinə görə, bu dəyişiklik minimum əməkhaqqının artırılmasında dövriliyin təmin olunması və prosesin qanunla tənzimlənməsi baxımından mühüm əhəmiyyət daşıyır:
"Minimum əməkhaqqının artırılması yalnız aşağı maaş alan vətəndaşlara deyil, vahid tarif cədvəli üzrə bütün pillələrə təsir göstərir. Belə ki, dövlət büdcəsindən maliyyələşdirilən sahələrdə çalışan işçilərin aylıq tarif və vəzifə maaşları minimum əməkhaqqındakı artıma uyğun şəkildə bir ay ərzində yenidən artırılır. Bu kateqoriyaya sosial sahə, elm, mədəniyyət, gənclər və idman, kənd təsərrüfatı, ekologiya və ətraf mühitin mühafizəsi, mənzil-kommunal təsərrüfatı, nəqliyyat, rabitə, meliorasiya, su təsərrüfatı və balıqartırma sahələrində çalışan, dövlət qulluqçusu statusu olmayan işçilər daxildir".
Deputat vurğulayıb ki, hazırda vahid tarif cədvəlində əməkhaqları 19 dərəcə üzrə müəyyənləşdirilir.
"Ən aşağı maaş 400 manat, ən yüksək maaş isə 1150 manat təşkil edir. Minimum əməkhaqqının mütəmadi artırılması praktik olaraq bütün dərəcələr üzrə maaş artımına səbəb olacaq. Minimum əməkhaqqının növbəti dəfə artırılması təxminən 700 min vətəndaşın gəlirlərinə müsbət təsir göstərə bilər. Artımın vaxtına gəlincə isə, “Əmək Məcəlləsi”nə dəyişikliklər Prezident tərəfindən 23 fevral 2026-cı ildə təsdiqlənib. Bu isə o deməkdir ki, həmin tarixdən etibarən bir il ərzində minimum əməkhaqqına ən azı bir dəfə yenidən baxılmalı və artım həyata keçirilməlidir".
Parlamentari əlavə edib ki, bəzi illərdə minimum əməkhaqqında bir neçə dəfə artım da mümkündür. Onun fikrincə, növbəti artımdan sonra proses daha da mütəmadi xarakter alacaq, çünki qanunvericilik minimum əməkhaqqına hər il ən azı bir dəfə baxılmasını tələb edir.
Türkan İsgəndərli
