Qallipoli Wreck Fest 2025: Çanaqqalanın sualtı irsi dünya gündəmində

Türkiyənin Şimal Egey bölgəsində yerləşən Çanaqqala növbəti dəfə beynəlxalq diqqət mərkəzinə çevrilir.

TodayPress TV xəbər verir ki, burada təşkil olunacaq nüfuzlu “Beynəlxalq Sualtı Fotoqrafiya Müsabiqəsi” şəhərin zəngin sualtı irsini dünya ictimaiyyətinə təqdim etməyi hədəfləyir. Tarixi, mifləri və təbiəti özündə birləşdirən Çanaqqala həm Troya xarabalıqları, həm də günəşli üzüm bağları və təmiz sahilləri ilə tanınır. Lakin bölgənin ən böyük sərvəti əslində dənizin dərinliklərində gizlənir.

Çanaqqala bu gün dünyanın ən cazibədar dalğıc məkanlarından biri hesab olunur. Burada sualtı tədqiqatçılar və dalğıclar təkcə zəngin dəniz aləmini deyil, həm də Birinci Dünya Müharibəsindən qalmış tarixi gəmi qalıqlarını araşdırmaq imkanı əldə edirlər.

Bu dəyərli irs Qallipoli Tarixi Sualtı Parkı ərazisində qorunur. XX əsrin ən mühüm hərbi qarşıdurmalarından birinə şahidlik edən bu unikal park zamanla təbiətin ayrılmaz parçasına çevrilmiş gəmi qalıqları ilə fərqlənir. Bu qalıqlar bu gün həm dəniz həyatına sığınacaq, həm də tarixlə canlı təbiətin qovuşduğu nadir məkandır.

“Gallipoli Wreck Fest – Beynəlxalq Sualtı Fotoqrafiya Müsabiqəsi” 2025-ci il avqustun 29-dan sentyabrın 7-dək Qallipoli Tarixi Sualtı Parkında keçiriləcək. Festival Çanaqqalanın sualtı gəmi qalıqlarını və dəniz irsini bu günə qədər görünməmiş vizual materiallarla dünyaya tanıtmağa hazırlaşır.

Dünyaca məşhur, sualtı çəkiliş sahəsində ixtisaslaşmış fotoqraflar və videomüxbirlər Çanaqqalaya toplaşaraq bölgənin mədəni irs və təbiət harmoniyasını əks etdirən unikal görüntülər yaradacaqlar. Bu əsərlər həm Birinci Dünya Müharibəsindən qalan gəmi qalıqlarının tanıdılmasına, həm də bölgədə dalğıc turizminin inkişafına mühüm töhfə verəcək.

Avqustun 29-da müsabiqə iştirakçıları əvvəlcə İstanbulda toplaşacaq, ertəsi gün isə Qallipoliyə yollanacaqlar. Orada, Seddülbahir Qalasında təntənəli açılış mərasimi keçiriləcək. Daha sonra iştirakçılara katerlər təhkim ediləcək və dalğıc avadanlıqları hazırlanacaq.

Avqustun 31-dən sentyabrın 3-dək beynəlxalq iştirakçılar dörd gün ərzində Qallipoli Tarixi Sualtı Parkının saf sularına dalaraq Birinci Dünya Müharibəsinə aid döyüş gəmiləri arasında çəkilişlər aparacaqlar. Sentyabrın 4-də həm fotoların texniki işlənməsi, həm də bölgə ilə daha yaxından tanış olmaq üçün vaxt ayrılacaq. Eyni zamanda, həmin gün müsabiqəyə son materiallar təqdim ediləcək.

Sentyabrın 5-də isə peşəkar və nüfuzlu münsiflər heyəti çəkilmiş əsərləri qiymətləndirəcək. Günün sonunda Mükafatlandırma mərasimi və rəsmi bağlanış tədbiri keçiriləcək.

Sentyabrın 6–7-də iştirakçılar İstanbula geri dönəcək və ölkələrinə, suyun altında gizlənən Çanaqqala tarixini əks etdirən unudulmaz görüntü və təəssüratlarla yola düşəcəklər.

Müsabiqə çərçivəsində çəkiləcək foto və videolar təkcə sənət əsəri olmayacaq. Bu vizual hekayələr tamaşaçını Çanaqqalanın keçmişinə canlı şahidlik etməyə sövq edəcək. Onlar bölgənin zəngin hərbi tarixi, sualtı irsi və ortaq mədəni yaddaşını beynəlxalq auditoriyaya çatdırmaqla yanaşı, mədəni irsin dayanıqlı şəkildə qorunmasına da xidmət edəcək.

“Gallipoli Wreck Fest” təkcə sualtı fotoqrafiyanın nümayişi deyil, eyni zamanda mədəni diplomatiya və təbiətə hörmət əsasında qurulmuş ağıllı və davamlı bir təşəbbüsdür. Bu tədbir Çanaqqalanı dünyanın aparıcı dalğıc mərkəzlərindən biri kimi tanıtmaq üçün unikal bir fürsət olaraq qiymətləndirilir.