Bank sektorunda kreditləşməyə dair sorğunun nəticələrini açıqlandı
Azərbaycan Mərkəzi Bankı (AMB) bu ilin I rübündə bankların kreditləşmə fəaliyyətinə və maliyyələşmə mənbələrinə dair keçirdiyi sorğunun nəticələrini açıqlayıb.
TodayPress TV bu barədə AMB-yə istinadən xəbər verir.
Sorğu nəticəsində məlum olub ki, I rübdə bankların biznes və ipoteka kreditləri üzrə siyasətində dəyişiklik olmasa da, istehlak kreditləri üzrə standartlarda sərtləşmə müşahidə edilib.
Banklar biznes və istehlak kreditlərinə tələbdə dəyişiklik olmadığını, ipoteka kreditləri üzrə isə tələbdə artım olduğunu bildirib. Sorğuya əsasən, banklar 2025-ci ilin II rübündə cəmi biznes və ipoteka kreditləri üzrə standartlarda dəyişiklik olmayacağı, bununla belə, istehlak kreditləri üzrə sərtləşmə trendinin davam edəcəyi qənaətindədirlər.
Banklar növbəti rübdə ipoteka və istehlak kreditlərinə tələbdə dəyişiklik olmayacağı, biznes kreditlərinə tələbdə isə artım olacağı ilə bağlı gözləntilərini bölüşüb.
Bankların cavablarına əsasən, maliyyələşmə mənbələrində fiziki və hüquqi şəxslərin müddətli depozitləri üzrə artım müşahidə olunub.
Respondentlər növbəti rübdə də bu istiqamətdə müsbət dinamikanın davam edəcəyini düşünür. Hesabatda sorğu nəticələrinə əsasən qeyd olunur ki, banklararası rəqabətin artması şəraitində fiziki və hüquqi şəxslərin tələbli və müddətli depozitləri üzrə maliyyələşmə dəyərində artım müşahidə olunub. Banklar növbəti rübdə də eyni tendensiyanın davam edəcəyi qənaətindədirlər.
Sektorun kreditləşmə və maliyyələşmə fəaliyyətində dəyişikliklər daim diqqətdə saxlanılır və müvafiq prudensial siyasət müəyyən edilir. 2025-ci ilin I rübü üzrə “Kreditləşmə fəaliyyəti və maliyyələşmə mənbələrinə dair sorğunun nəticələri” ilə bu linkdən tanış olmaq mümkündür:
