“Yeni mərhələ üçün Azərbaycanın haqlı tələblərinə əməl olunmalıdır” – RƏY
“Azərbaycan və Rusiya prezidentləri arasındakı görüş iki ölkə arasında yaranmış soyuqluğu müəyyən dərəcədə aradan qaldıra bilər, lakin münasibətlərin tam normallaşması üçün hələ də çoxsaylı maneələr mövcuddur”.
Politoloq Çingiz Şahbazi bunu TodayPress TV-yə açıqlamasında deyib.
O bildirib ki, AZAL-a məxsus sərnişin təyyarəsinin Rusiya tərəfindən vurulmasından sonra Azərbaycan tərəfi hadisə ilə bağlı Moskvanın məsuliyyəti qəbul etməsini, rəsmi şəkildə üzr istəməsini, hadisə barədə ətraflı hesabat təqdim etməsini və təyyarədə olanlara təzminat ödənilməsini tələb kimi irəli sürüb. Lakin Rusiya Azərbaycanın bu haqlı tələblərinə adekvat cavab vermək əvəzinə, ölkəmizə qarşı təzyiq mexanizmlərindən istifadə cəhdlərinə başlayıb. Bunun nəticəsində iki ölkə arasında siyasi mühitdə gərginlik yaranıb.
Ekspert okyabrın 9-da Tacikistanın paytaxtı Düşənbədə Azərbaycan Prezidenti İlham Əliyev və Rusiya Prezidenti Vladimir Putin arasında keçirilən görüşdən bəhs edib:
“Tacikistanın paytaxtı Düşənbədə MDB dövlət başçılarının toplantısı çərçivəsində prezidentlər Vladimir Putin və İlham Əliyev arasında keçirilən görüş iki ölkə arasında siyasi və iqtisadi əlaqələr baxımından yaranmış soyuqluğu müəyyən dərəcədə aradan qaldıra bilər. Bununla belə, münasibətlərin əvvəlki səviyyədə tam normallaşması üçün hələ də çoxsaylı maneələrin mövcud olduğunu nəzərə almaq lazımdır.
Son dövrlərdə baş verən hadisələri və ümumi vəziyyəti təhlil edərkən, xüsusilə Azərbaycanın vurulmuş sərnişin təyyarəsi ilə bağlı tələblərinin tam şəkildə yerinə yetirilməsi məsələsi üzərində dayanmaq vacibdir. Rusiya bu tələblərə əməl etdiyi halda, vəziyyətin yumşalması və dialoqun bərpası üçün real zəmin yaranar. Moskva Azərbaycana münasibətdə siyasətinə yenidən korrektə etməyi ciddi şəkildə nəzərdən keçirməlidir”.
Ç.Şahbazi əlavə edib ki, Azərbaycan bu gün çoxvektorlu siyasət yürüdür və regionda mühüm nüfuza malik Türkiyənin yaxın müttəfiqidir. Eyni zamanda Qərb dövlətləri, ABŞ və Çinlə əlaqələrini genişləndirir. Xüsusilə torpaqlarını işğaldan azad etdikdən sonra Azərbaycan həm siyasi, həm də iqtisadi baxımdan regionda aparıcı rol oynamağa başlayıb. Rusiya isə Cənubi Qafqazda və ümumilikdə regionda əvvəlki mövqelərini qoruyub saxlaya bilməyib, təsir dairəsi nəzərəçarpacaq dərəcədə daralıb. Bu şəraitdə Azərbaycan öz mövqeyini gücləndirmək üçün yaranmış fürsətlərdən məharətlə istifadə edir və bu siyasəti gələcəkdə daha da aktiv şəkildə davam etdirmək niyyətindədir.
"Bu baxımdan, Düşənbə görüşü daha çox simvolik xarakter daşıyır. İki ölkə arasında münasibətlərin real şəkildə bərpası və yeni mərhələyə keçidi yalnız Azərbaycanın haqlı tələblərinə əməl olunduqdan sonra mümkün ola bilər", - deyə politoloq fikrini yekunlaşdırıb.
Qiymət Mahir
FOTOLAR
