Prezidentin Kopenhagen görüşləri: Münasibətlərdə yeni mərhələ
Azərbaycan Respublikasının Prezidenti İlham Əliyev oktyabrın 1-də Kopenhagenə işgüzar səfər edib.
Bu səfər “Avropa Siyasi Birliyi”nin “7-ci Zirvə görüşü” çərçivəsində baş tutub və prezident səfər çərçivəsində Avropa Komissiyası Prezidenti Ursula Fon der Lyayen, İtaliya Baş naziri Giorgia Meloni və digər Avropa rəsmiləri ilə mühüm ikitərəfli görüşlər keçirib.
Görüşlərdə enerji təhlükəsizliyi, regionda sülh prosesləri və Azərbaycanın Avropa ilə inteqrasiyası kimi prioritet mövzular müzakirə olunub.
“Bu səfər əməkdaşlığın yeni formatlarının müzakirəsinə zəmin yaradır”
Sözügedən görüşləri TodayPress TV-yə şərh edən Deputat Naqif Həmzəyev bildirib ki, Prezident İlham Əliyevin Kopenhagendə keçirilən “Avropa Siyasi Birliyi”nin Zirvə görüşündə iştirakı və rəsmi görüşləri Azərbaycan-Avropa münasibətlərində bir neçə mühüm mərhələnin başlanğıcı kimi qiymətləndirilə bilər:
“Enerji tərəfdaşlığının dərinləşməsi Azərbaycanın Avropa üçün strateji əhəmiyyətini daha da artırır. Rusiya-Ukrayna müharibəsinin yaratdığı enerji böhranı fonunda Azərbaycan alternativ enerji mənbəyi olaraq Avropanın enerji təhlükəsizliyində diversifikasiya axtarışını dəstəkləyir. Bu səfər əməkdaşlığın yeni formatlarının müzakirəsinə zəmin yaradır və regional enerji inteqrasiyasının genişləndirilməsinə töhfə verəcək”.
“Trampın bu prosesə töhfəsi Avropa liderlərini də aktiv rol oynamağa məcbur edir”
Onun sözlərinə görə, sülh proseslərində Avropanın rolunun artırılması vacibdir. Ermənistan-Azərbaycan münasibətlərində normallaşma və regionda davamlı sülhün təmin olunması üçün Avropa strukturlarının fəal iştirakı mühüm əhəmiyyət kəsb edir. ABŞ Prezidenti Donald Trampın bu prosesə töhfəsi Avropa liderlərini də aktiv rol oynamağa məcbur edir.
Naqif Həmzəyev Azərbaycanın geosiyasi balanslaşdırma siyasətinin davam etdirilməsinin əhəmiyyətini də vurğulayıb.
"Azərbaycan Şərq və Qərblə paralel əməkdaşlıq siyasətini davam etdirir. Bu səfər Azərbaycanın Avropa inteqrasiyasında yeni addımlar atmaq istəyini nümayiş etdirir, lakin bu tam qərbyönümlü siyasətə keçid deyil, çoxtərəfli diplomatiya strategiyasının davamıdır", - o, həmçinin deyib.
Parlamentari onu əlavə edib ki, iqtisadi əməkdaşlığın genişləndirilməsi də önəmli istiqamətdir. Enerji sektorundan kənarda ticarət, investisiyalar, infrastruktur layihələri və regional əlaqələndirmə məsələlərində əməkdaşlığın gücləndirilməsi perspektivləri araşdırılır və yaxın zamanlarda bu sahədə mühüm addımların atılması planlaşdırılır.
Azərbaycanın beynəlxalq nüfuzunun artırılması istiqamətində davamlı işlər aparılır. Belə yüksək səviyyəli görüşlər Azərbaycanın regional və beynəlxalq arenada konstruktiv və etibarlı tərəfdaş kimi mövqeyini möhkəmləndirir. Bu səfər praqmatik tərəfdaşlıq və qarşılıqlı maraqlar əsasında qurulan münasibətlərin yeni mərhələsinin göstəricisi hesab olunur. Yəni Avropa üçün enerji təhlükəsizliyi və regional sabitlik, Azərbaycan üçün isə iqtisadi inkişaf və beynəlxalq inteqrasiyada yeniliklər vəd edir.
Jalə Rövşən
FOTOLAR
