Politoloq: “ABŞ Əfqanıstanı rəqiblərinə təslim etmədi”
“Əfqanıstan bataqlığından yaxa qurtarmaq üçün ABŞ bu ölkəni tərk etmək məcburiyyətində qaldı”.
Politoloq Mütəllim Rəhimli bunu TodayPress TV-yə şərh edərkən bildirib.
“ABŞ Əfqanıstanı öz rəqiblərinə, xüsusilə Rusiyaya təslim etmədi”
O vurğulayıb ki, ABŞ-nin Əfqanıstanda öz strateji məqsədlərinə tamamilə çatmadığını iddia etmək düzgün olmazdı. ABŞ Əfqanıstanı öz rəqiblərinə, xüsusilə Rusiyaya təslim etmədi. Bu ölkədə elə bir hakimiyyət formalaşdı ki, ona nəzarət etmək istəyən dövlətlər buna nail ola bilmədilər.
“Hazırda Əfqanıstana nəzarət uğrunda açıq hərbi münaqişənin perspektivi görünmür, lakin bu, ölkənin güc mərkəzlərinin diqqətindən kənarda qaldığı mənasına gəlmir. Trampın “Baqram” aviabazasını geri qaytarmaq təklifi Əfqanıstan və region uğrunda davam edən gizli rəqabətin yalnız aşkara çıxan kiçik bir hissəsidir”, - deyə siyasi şərhçi diqqətə çatdırıb.
“ABŞ-nin bu ölkəyə qoşun yeritməsi beynəlxalq hüququn pozulması və işğalçı addım kimi qiymətləndirilməlidir”
O, həmçinin xatırladıb ki, ötən müddət ərzində Əfqanıstan hakimiyyəti öz dayaqlarını möhkəmləndirib və əvvəlkindən daha güclü mövqe qazanıb. Ölkədə illərlə davam edən vətəndaş müharibəsinə demək olar ki, son qoyulub. Belə bir şəraitdə hər hansısa hərbi müdaxilə kəskin və qəzəbli cavabla qarşılanacaq. Bu isə daha dəhşətli toqquşmalar və ağır hərbi, siyasi, humanitar fəlakətlərə yol aça bilər.
“Rusiya, Çin və digər region ölkələrinin sərt reaksiyası gözlənilir”
“Əfqanıstanın razılığı olmadan ABŞ-nin bu ölkəyə qoşun yeritməsi beynəlxalq hüququn pozulması və işğalçı addım kimi qiymətləndirilməlidir. Daha təhlükəli məqam odur ki, belə bir hərəkətə Rusiya, Çin və digər region ölkələrinin sərt reaksiyası gözlənilir. Bu isə böyük güclərin toqquşmasına və münaqişənin daha da genişlənməsinə zəmin yarada bilər”, - deyə analitik fikrini yekunlaşdırıb.
Qeyd edək ki, sentyabrın 18-də ABŞ Prezidenti Donald Tramp Əfqanıstandakı “Baqram” aviabazasını geri qaytarmağa ümid etdiyini və bunun üçün müəyyən addımlar atıldığını bəyan edib.
Aysel Mətləb
FOTOLAR
