Bitməyən HÜCUMUN SİRRİ: Netanyahu Trampı BELƏ inandırıb...
ABŞ, Ukrayna vasitəsilə Rusiyanı yumşaldaraq Çinə qarşı strateji üstünlük əldə etməyə çalışır. Bu barədə "Politico" nəşri məlumat yayıb.
Maraqlıdır, bu ABŞ-nin Çinə qarşı geosiyasi üstünlük əldə etmək məqsədini nə dərəcədə reallaşdıra bilər?
Sözügedən mövzunu politoloq Elşad Həsənov TodayPress TV-yə şərh edib.
O, qeyd edib ki, ABŞ Ukrayna müharibəsi ilə Rusiyanı zəiflədir:
"ABŞ Ukrayna vasitəsilə Rusiyanı müharibəyə cəlb etdi və artıq beşinci ildir ki, Rusiya–Ukrayna müharibəsi davam edir. ABŞ Ukraynaya lazım olan silah-sursatı vaxtında vermədi ki, Ukrayna öz torpaqlarını tam şəkildə işğaldan azad edə bilsin. Buna isə Amerika imkan vermədi. Niyə? Səbəb aydındır: Rusiyanı düşdüyü bataqlıqda daha da zəiflətmək. Yəni Rusiya iqtisadi cəhətdən zəifləyir, hərbi potensialı tükənir, tankları və raket ehtiyatları azalır. Nəticədə, gələcəkdə mümkün ABŞ–Çin qarşıdurmasında Rusiya Çinə ciddi dəstək verə bilməyəcək".
Ekspert hesab edir ki, bu gün baş verən ABŞ–İsrail–İran gərginliyi də müəyyən mənada həmin gələcək qarşıdurmaya hazırlıq kimi qiymətləndirilə bilər:
"İsrailin təkidi ilə ABŞ və İsrail birlikdə İrana qarşı hərbi əməliyyatlara başlayıb və artıq 19 gündür bu münaqişə davam edir. Bu müharibədə İsrail və ABŞ İranın hərbi obyektlərinə zərbələr endirsələr də, onu tam məğlub edə bilmirlər. Çünki İranın arxasında həm Rusiya, həm də Çin dayanır. Çin İrana ciddi siyasi dəstək verir və bir neçə dəfə ABŞ-dən hücumları dayandırmağı tələb edib".
Analitik bildirib ki, İran burada müəyyən mənada Çinin proksi qüvvəsi kimi çıxış edir:
"İran bu münaqişədə geri çəkilmədi. Əgər danışıqlar zamanı İran nüvə proqramını dayandırmağa razılaşsaydı, bəlkə də müharibə baş verməzdi. Lakin onlar bu proqramdan imtina etmədiklərini və sona qədər davam edəcəklərini bildirdilər. Hətta İsraili məhv edəcəklərinə dair təhdidlər də səsləndirdilər. Bu səbəbdən Netanyahu Trampı inandıra bildi ki, İran yaxın zamanda nüvə silahı əldə edə bilər və bu, həm İsrail, həm də ABŞ üçün təhlükə yaradır. Nəticədə, Tramp müharibəyə başlamaq qərarı verdi. Lakin bu gün ABŞ cəmiyyətində də buna qarşı etirazlar artmaqdadır. Hətta Tramp administrasiyasında yüksək vəzifəli şəxslərdən biri – antiterror mərkəzinin rəhbəri – bu siyasətə etiraz olaraq istefa verib. Ümumilikdə, əhalinin böyük hissəsi bu müharibənin dayandırılmasını istəyir".
E.Həsənov vurğulayıb ki, ümumilikdə, hazırda baş verən münaqişələr bir növ gələcək böyük güclər qarşıdurmasının sınaq mərhələsi kimi görünür.
"Bu qarşıdurmanın əsas mərkəzində isə Tayvan məsələsi dayanır. ABŞ Tayvanı Çinə vermək istəmir, Çin isə onu öz ayrılmaz hissəsi hesab edir. Necə ki ABŞ Ukrayna vasitəsilə Rusiyanı zəiflətməyə çalışır, Çin də İran vasitəsilə ABŞ-ni zəiflətmək və gələcək qarşıdurmada üstünlük qazanmaq niyyətindədir", - analitik fikrini sonlandırıb.
Jalə Rövşən
