Enerjidə sabitlik və güc: “8 Noyabr” Stansiyası ölkənin iradəsinin simvoludur

“8 Noyabr” Elektrik Stansiyası Azərbaycanın enerji təhlükəsizliyinin və dayanıqlı inkişafının simvoludur”.

Milli Məclisin deputatı Nigar Məmmədova bunu TodayPress TV-yə danışarkən bildirib. 

Onun sözlərinə görə, Mingəçevirdə istifadəyə verilən “8 Noyabr” Elektrik Stansiyası Azərbaycanın enerji sektorunda mühüm strateji addım olmaqla yanaşı, bütövlükdə ölkənin enerji təhlükəsizliyini və iqtisadi sabitliyini daha da gücləndirəcək. 

“Dünya üzrə artan enerji tələbatı və geosiyasi kataklizmlər fonunda daxili enerji infrastrukturuna və yeni texnologiyalara yönələn investisiyalar xüsusi aktuallıq daşıyır. Bu baxımdan Azərbaycanın düzgün və uzaqgörən enerji siyasəti həm milli maraqları müdafiə edir, həm də ölkənin xarici risklərə qarşı dayanıqlığını gücləndirir”.

Millət vəkili yeni elektrik stansiyasının əsas üstünlüklərindən biri kimi təbii qaza qənaət və karbon emissiyalarının azaldılmasını göstərib. Onun qənaətincə, bu, Azərbaycanın iqlim gündəliyinə qarşı məsuliyyətli davranışını bir daha sübut edir. Həmçinin, Azərbaycanın COP29-un ev sahibi kimi üzərinə götürdüyü öhdəliklərlə səsləşir və aşağıkarbonlu gələcək yolunda konkret addım kimi qiymətləndirilə bilər.

“Hazırda Azərbaycan qazı ilə enerji təhlükəsizliyini təmin edən ölkələrin sayı artır. Ölkəmiz Pan-Avropa enerji təchizatçısı kimi qəbul olunur və bu istiqamətdə əməkdaşlıq etmək istəyən tərəfdaşlar da çoxalır. Xüsusilə bu gün dünyada enerji xətlərinə yönələn təhdidlər fonunda Azərbaycanın sabitliyi və inkişaf modeli daha da ön plana çıxır. Yeni stansiyanın inşasında İtaliya və Çin şirkətlərinin fəal iştirakı, ölkəmizdəki sabit və etibarlı investisiya mühitinə olan inamın göstəricisidir. Sabitlik və təhlükəsizlik axtaran beynəlxalq investorlar üçün Azərbaycan cəlbedici tərəfdaş kimi formalaşıb. Bu sabitliyin əsasında isə Azərbaycanın öz gücünə və xalqının iradəsinə əsaslanan siyasəti dayanır”.

Parlamentari xüsusi olaraq diqqətə çatdırıb ki, 44 günlük Vətən müharibəsi zamanı Mingəçevir - Azərbaycanın enerji ürəyi – düşmənin birbaşa hədəfi olub. Prezidentin də vurğuladığı kimi, bunun da məqsədi bizim enerji infrastrukturumuzu iflic vəziyyətinə salmaq idi. Lakin bu niyyət baş tutmadı. Elə yeni stansiyanın “8 Noyabr” adlandırılması da Zəfər Günü ilə birbaşa bağlıdır və rəmzi məna daşıyır.

“Bu stansiya təkcə energetika obyektindən ibarət deyil – o, həm də Azərbaycanın enerji təhlükəsizliyinə, texnoloji tərəqqisinə və sabit inkişaf yoluna inamın təcəssümüdür. Beynəlxalq tərəfdaşlar da bu nəhəng layihəni ölkəmizin uzunmüddətli inkişaf strategiyasına və beynəlxalq enerji sisteminə verdiyi töhfənin simvolu kimi dəyərləndirirlər”, - deyə o, nitqini sonlandırıb.

Qeyd edək ki, Azərbaycan Respublikasının Prezidenti İlham Əliyev iyunun 24-də Mingəçevirdə “8 Noyabr” Elektrik Stansiyasının açılışını edib.

Töhfə Səməd