Bakıdan dünyaya çağırış: 3.5 milyard insanın mənzil...
WUF13 çərçivəsində qlobal mənzil böhranının həlli üçün çoxtərəfli əməkdaşlıq, innovativ maliyyələşmə və bütün səviyyələrdə koordinasiyalı fəaliyyətin vacibliyi vurğulanıb.
TodayPress TV xəbər verir ki, bunu Dövlət Şəhərsalma və Arxitektura Komitəsinin sədri Anar Quliyev WUF13-ün rəsmi bağlanış mətbuat konfransında çıxışı zamanı deyib.
O bildirib ki, WUF13 qlobal mənzil böhranının həlli istiqamətində effektiv çoxtərəfliliyə, daha güclü tərəfdaşlıqlara, innovativ maliyyə mexanizmlərinə və bütün səviyyələrdə koordinasiyalı fəaliyyətə diqqət yönəldib:
“Forum təkcə miqyasına görə deyil, həm də innovativ formatları, inklüziv iştirakı və məzmunlu nəticələri ilə yadda qalacaq. Forum zamanı aparılan müzakirələrin, yaradılan imkanların və irəli sürülən həllərin konkret fəaliyyətlərə çevriləcəyi və dünyada 3,5 milyard insanı təsir edən mənzil və evsizlik problemlərinin aradan qaldırılmasına töhfə verəcəyi gözlənilir”.
Komitə sədri vurğulayıb ki, İnsan Hüquqları üzrə Ümumdünya Bəyannaməsinin 25-ci maddəsində qeyd olunduğu kimi, mənzil insan hüququdur və bu hüquq hər kəsin rifahı naminə təmin edilməlidir.
Anar Quliyev media nümayəndələrinin rolunu da xüsusi qeyd edib.
“WUF13 barədə məlumatların ictimaiyyətə çatdırılmasında sizin rolunuz çox vacibdir. Forumu işıqlandırmaqla onun məqsədlərinin, nailiyyətlərinin və müzakirələrinin qlobal ictimaiyyətə geniş şəkildə çatdırılmasını təmin edirsiniz”, – deyə o bildirib.
Komitə sədri əlavə edib ki, təşkilatçılar hər bir iştirakçının Bakıdan yalnız ilham almış şəkildə deyil, həm də güclü tərəfdaşlıqlar, aydın prioritetlər və yenilənmiş qətiyyətlə ayrılacağını ümid edir.
Anar Quliyev çıxışını “Tezliklə Meksikada görüşərik” sözləri ilə yekunlaşdırıb.
Qiymət Mahir
