PLANET TƏHLÜKƏDƏ: alimlərdən gözlənilməz xəbərdarlıq
Çelyabinsk meteoritinə bənzər ölçüyə malik iki böyük asteroid 18 və 19 may tarixlərində Yer kürəsinin yaxınlığından keçəcək.
TodayPress TV xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiya Laboratoriyası və Sibir Bölməsinin Günəş-Yer Fizikası İnstitutu məlumat verib.
Laboratoriyanın açıqlamasında hər iki səma cisminin Yer üçün heç bir təhlükə yaratmadığı vurğulanıb.
Sözügedən asteroidlər 2026 JH2 və 2026 KB-dir. Birinci asteroid 10 mayda, ikinci isə 13 mayda, Yerə ən yaxın keçidindən bir neçə gün əvvəl kəşf edilib. Mütəxəssislərin qeyd etdiyinə görə, bu cür gec kəşflər böyük səma cisimlərinin planetin yaxınlığında gözlənilmədən aşkar oluna biləcəyini göstərir.
İlkin hesablamalara əsasən, hər iki asteroidin diametri təxminən 20 metrdir. Bu göstərici 15 fevral 2013-cü ildə Yerə düşən və XXI əsrdə planetə təsir göstərmiş ən böyük səma cisimlərindən biri olan Çelyabinsk meteoritinə uyğundur.
2026 KB asteroidi Yerə təxminən 230 000 km məsafədən yaxınlaşacaq. Onun ən yaxın keçidi 18 mayda Moskva vaxtı ilə saat 18:15-də gözlənilir.
İkinci obyekt olan 2026 JH2 isə bir qədər böyükdür və 19 mayda, Moskva vaxtı ilə təxminən saat 01:00-da Yer kürəsinin yanından təxminən 91 000 km məsafədən keçəcək. Laboratoriyanın məlumatına görə, bu, rekord səviyyəli yaxınlaşma olmasa da, 2026-cı ildə bu ölçüdə bir asteroid üçün ən yaxın keçid ola bilər.
Alimlər əlavə ediblər ki, 2026 JH2 asteroidini nəzəri olaraq yarıpeşəkar avadanlıqla müşahidə etmək mümkündür. Lakin yüksək sürət səbəbilə bu, çətin olacaq və müşahidə üçün dəqiq vaxt və istiqamət hesablamaları tələb olunur.
Jalə Rövşən
