Cüdo millimiz Avropa Kubokunun qalibi oldu

Gənc cüdoçuların Şimali Makedoniyanın paytaxtı Skopyedə keçirilən Avropa Kuboku turniri başa çatıb.

TodayPress TV xəbər verir ki, turnirin son günündə Süleyman Şükürov (81 kq) və Ramazan Əhmədov (+100 kq) bütün görüşlərini qələbə ilə başa vuraraq qızıl medal qazanıblar.

Daha əvvəl Nihad Məmişov (60 kq) və Abil Yusubov (73 kq) da fəxri kürsünün ən yüksək pilləsinə qalxıblar. Fərid Qarayevin (60 kq) Skopye turnirindən qazancı gümüş, Məhəmməd Musayevin (66 kq) isə bürünc medal olub.

Qeyd edək ki, Azərbaycan yığması ümumilikdə 4 qızıl, 1 gümüş və 1 bürünc medal qazanaraq, komanda hesabında 26 ölkə arasında 1-ci olub.

Namiq HUN