Ruttedən Trampa tərif mesajı

ABŞ prezidenti Donald Tramp, NATO-nun Haaqada keçirilən sammitinə uzun uçuşu zamanı sosial mediada müxtəlif paylaşımlar edib. Onların arasında NATO-nun yeni baş katibi Mark Ruttedən Trampa ünvanlanan “şirinliklə dolu” xoş gəlmisiniz mesajı da yer alıb.

TodayPress TV xəbər verir ki, bu barədə "Yle"nin yayımladığı təhlil yazısında məlumat verilib. 

Rutte mesajında Trampın İranla bağlı atdığı addımları tərifləyib və bildirib ki, NATO ölkələrinin müdafiə xərclərini ÜDM-in 5 faizinə çatdırmaq qərarını qəbul etməsi də məhz Trampın tələbi ilə baş verib. Rutte mesajında belə yazıb: “Avropa, layiq olduğu kimi, artıq böyük miqdarda ödəyəcək və bu, sizin üçün bir qələbədir”.

Bu tərif dolu mesajlar, müşahidəçilərə görə, Ruttenin Trampın razılığını almaq və onun eqosunu oxşamaq üçün bütün vasitələrə əl atmağa hazır olduğunu göstərir.

NATO-da görüntü birliyi, daxildə fikir ayrılığı

Lakin Tramp "Air Force One" təyyarəsindən enərkən Avropada siyasətin mürəkkəbliyini və NATO daxilindəki ziddiyyətləri tam dərk etmədiyi də qeyd olunur. Sammitdə vahid və yekdil mövqe nümayiş etdirilməyə çalışılsa da, pərdəarxasında ciddi fikir ayrılıqları mövcuddur.

Məsələn, İspaniya müdafiə xərclərini ÜDM-in 5 faizinə çatdırmaq niyyətində olmadığını bəyan edib. Baş nazir Pedro Sançes hökuməti hesab edir ki, bu məqsədlərə daha az vəsaitlə də nail olmaq mümkündür. Tramp bu bəyanatı tənqid etsə də, NATO rəhbərliyi bunu rəsmi problem kimi görmür. Əsas şərt İspaniyanın alyansın hərbi qabiliyyət hədəflərinə sadiq qalmasıdır.

Siyasi müşahidəçilər sammitin gedişində yeni təzyiqlər, diplomatik təvazökarlıqlar və daha çox tərif dolu çıxışların olacağını proqnozlaşdırır. NATO-nun birliyini qorumaq üçün şirin sözlərə və simvolik jestlərə ehtiyac olduqca çoxdur.

Töhfə Səməd