Britaniya Starmerin yerinə namizədlər axtarmağa başlayır
Böyük Britaniyada hakim Leyboristlər Partiyasının deputatları partiya lideri və Baş nazir Kir Starmerin əvəzlənməsi üçün mümkün namizədlər axtarmağa başlayıblar.
TodayPress TV xəbər verir ki, bu barədə “The Daily Telegraph” qəzeti mənbələrə istinadən məlumat yayıb.
Bildirilib ki, bu məqsədlə partiyanın nüfuzlu üzvlərinə namizədliklərini irəli sürmək təklif olunub.
Məlumata əsasən, bu cür təkliflər keçmiş vitse-premyer Anjela Reynerə və səhiyyə naziri Ues Stritinqə ünvanlanıb.
Nəşr anonim nazirin sözlərinə istinadən yazır ki, faktiki olaraq partiya daxilində liderliyin dəyişdirilməsi kampaniyasına başlanması çağırışları edilir. Qeyd olunub ki, məsələ fevralın 5-də leyborist deputatların görüşündə, həmçinin partiya üzvlərinin “WhatsApp” qrupunda müzakirə edilib.
Mənbə əlavə edib ki, Kir Starmerin siyasi mövqeyi ABŞ-yə səfir təyin olunmuş Piter Mandelsonla bağlı qalmaqaldan sonra zəifləyib. Mandelsonun amerikalı maliyyəçi Ceffri Epşteynlə bağlı yayılan materiallarda adının hallanması ictimai rezonans doğurub. 2025-ci ilin sentyabrında vəzifəsindən uzaqlaşdırılan Mandelson fevral ayında Leyboristlər Partiyasını və Lordlar Palatasını da tərk edib.
Məlumata görə, “Scotland Yard” Mandelsonla bağlı cinayət araşdırmasına başlayıb, Starmer isə fevralın 5-də bu təyinatla bağlı üzr istəmək məcburiyyətində qalıb.
“The Spectator” jurnalı yazır ki, yaranmış qalmaqal Kir Starmer üçün baş nazir postunun itirilməsi ilə nəticələnə bilər.
Aysel Mətləb
