Bayden dövründə baş verən hadisələr araşdırılır: Ağ Evdən kokain tapıldı, məlumatlar sızdırıldı

ABŞ Federal Təhqiqatlar Bürosu (FBI) Cozef Bayden administrasiyası dövründə baş verən iki yüksək profilli hadisə üzrə istintaqı gücləndirməyə başlayıb.

TodayPress TV xəbər verir ki, bu barədə FBI-ın direktor müavini Den Bonjino sosial şəbəkə platforması "X"də məlumat verib.

Söhbət 2023-cü ildə Ağ Evdə kokain tapılması və Ali Məhkəmənin abort hüquqlarını ləğv edən Dobbs Cekson işi üzrə qətnamə layihəsinin 2022-ci ildə mətbuata sızdırılması hadisələrindən gedir.

Mühafizəkarlar hər iki hadisəyə sərt reaksiya veriblər. Həmin dövrdə “MAGA” tərəfdarı podkast aparıcısı olan Bonjino 2023-cü ildə Ağ Evdə aşkar edilən kokainlə bağlı suallar qaldırmışdı.

Bonjino əlavə edib ki, FBI həmçinin 6 yanvar hadisələrindən bir gün öncə Demokrat və Respublikaçı partiyalarının Vaşinqtondakı baş qərargahları yaxınlığında yerləşdirilmiş, lakin partlamamış boru tipli bombalarla bağlı istintaqı da yenidən canlandırıb.

Bonjino bildirib ki, andiçmədən dərhal sonra o və FBI direktoru Kaş Patel ictimai korrupsiya ilə bağlı bir sıra diqqətçəkən işləri nəzərdən keçirərək onların istintaqına əlavə resurslar ayırmaq və ya yenidən açmaq qərarı veriblər.

2023-cü ilin iyul ayında Ağ Evdə aşkar edilən kokainlə bağlı ABŞ Gizli Xidməti istintaqı sübut çatışmazlığı səbəbindən dayandırmışdı. Maddə Qərb İcraçı prospektinin girişindəki lobbi sahəsində tapılmışdı.

2023-cü ilin yanvarında Ali Məhkəmə sızdırılmış sənədin kim tərəfindən mətbuata ötürüldüyünü müəyyən edə bilmədiyini açıqlamışdı. Həmin vaxt Donald Tramp məsul jurnalistlərin həbsini tələb etmişdi.

2024-cü ilin yanvarında FBI partlamamış boru bombaları ilə bağlı yeni görüntülər və əlavə məlumatlar yaymışdı. Lakin 600-dən çox ipucu və 1,000-dən artıq müsahibəyə baxmayaraq hadisə hələ də açılmayıb.

Bonjino bildirib ki, “irəliləyiş var” və ictimaiyyəti bu işlərlə bağlı məlumatı olan şəxsləri FBI ilə əlaqə saxlamağa çağırıb.

Töhfə Səməd