100-dən çox tələbə AQC-də təcrübə keçəcək – FOTO
Azərbaycan Qiymətləndiricilər Cəmiyyəti (AQC) ali təhsil müəssisələri ilə əməkdaşlıq çərçivəsində növbəti irimiqyaslı layihəyə start verib.
TodayPress TV xəbər verir ki, Azərbaycan Dövlət İqtisad Universiteti (UNEC) və Avrasiya Universiteti ilə AQC arasında imzalanmış əməkdaşlıq memorandumlarına uyğun olaraq, tələbələrin istehsalat təcrübəsi proqramına rəsmi başlanılıb.
Proqram çərçivəsində hər iki universitetin müvafiq ixtisasları üzrə təhsil alan 100-dən çox tələbəsi AQC-yə üzv olan aparıcı qiymətləndirmə şirkətlərinə ezam olunublar. Tələbələr bir ay müddətində peşəkar qiymətləndiricilərin rəhbərliyi altında real iş prosesində iştirak edəcək, nəzəri biliklərini praktiki müstəvidə tətbiq etmək imkanı qazanacaqlar.
Layihənin başlanması ilə əlaqədar AQC-nin mərkəzi ofisində bir qrup tələbə ilə görüş keçirilib. Görüşdə çıxış edən Azərbaycan Qiymətləndiricilər Cəmiyyətinin İdarə Heyətinin sədri Vüqar Oruc gənclərin peşəkar inkişafının cəmiyyət üçün prioritet istiqamətlərdən biri olduğunu vurğulayıb:
“Müasir əmək bazarının tələbləri yalnız nəzəri hazırlıqla məhdudlaşmır. Universitetlərlə qurduğumuz bu sıx əməkdaşlıq tələbələrin ali təhsil ocaqlarında mənimsədikləri akademik biliklərin real bazar mühitində sınaqdan keçirilməsinə və tətbiqinə şərait yaradır. Bizim məqsədimiz ölkədə qiymətləndirmə sektorunun gələcək kadr potensialını formalaşdırmaq və gənclərə bu spesifik sahənin incəliklərini peşəkarlardan öyrənmək şansı verməkdir”.
Vüqar Oruc həmçinin qeyd edib ki, təcrübə müddətində fərqlənən və xüsusi bacarıq nümayiş etdirən tələbələr gələcəkdə AQC-yə üzv şirkətlərdə daimi işlə təmin olunma şansı əldə edəcəklər.
Qeyd edək ki, təcrübə proqramı dövründə tələbələr daşınmaz əmlakın, daşınar əmlakın və biznesin qiymətləndirilməsi sahəsində beynəlxalq standartların tətbiqi, hesabatların hazırlanması və bazar təhlili kimi mövzularda praktik vərdişlərə yiyələnəcəklər.
PHOTOS
