Sülh nağılı bitdi: Paşinyanın başı üstündə yenidən "Dəmir yumruq" yellənir

Ermənistanın baş naziri Nikol Paşinyanın sülh vədləri ilə real addımları arasında ziddiyyət getdikcə daha aydın görünür.

2018-ci ildə hakimiyyətə gələndə Azərbaycanla münasibətlərdə sərt mövqe tutan Ermənistan baş naziri indi fərqli ritorikadan istifadə etsə də, bu, onun siyasi xəttinin dəyişdiyini göstərmir. Əsas məsələ Paşinyanın nə danışması deyil, verdiyi vədləri nə dərəcədə yerinə yetirməsidir.

Seçkilərdən sonra konstitusiya referendumu keçirilməsi və sülh prosesində irəliləyiş əldə olunması ilə bağlı vədlərin vaxt baxımından uzadılması suallar yaradır. Azərbaycan üçün konstitusiyadakı ərazi iddialarının aradan qaldırılması sülh müqaviləsinin əsas şərtlərindən biridir. Bu məsələni qeyri-müəyyən gələcəyə saxlamaq isə danışıqların nəticəsi ilə bağlı şübhələri artırır.

İrəvan sülhə həqiqətən hazırdırsa, bunu yeni tarixlər və bəyanatlarla uzatmaqdansa,  konkret qərarlarla göstərməlidir.

Azərbaycan hərbçisinin Ermənistan ərazisinə keçməsi ilə bağlı insident də iki ölkə arasında münasibətlərin nə qədər həssas olduğunu göstərdi. Hadisənin siyasi müstəvidə geniş müzakirəyə çıxarılması və hərbçinin həbs edilməsi onsuz da kövrək olan etimad mühitini daha da çətinləşdirir. Sərhəddə baş verən belə insidentlərin siyasi təzyiq vasitəsinə çevrilməsi sülh prosesinə təbii ki, xidmət etmir.

Türkiyə ilə sərhədlərin açılması məsələsi də bu kontekstdə qiymətləndirilə bilər.  Ermənistan Ankara ilə münasibətlərin normallaşmasından iqtisadi və regional baxımdan faydalana bilər. Lakin bu, Azərbaycanla sülh müqaviləsi üzrə öhdəlikləri arxa plana keçirmək üçün əsas yaratmır. Əgər İrəvan Türkiyə ilə əlaqələrin genişlənməsini Azərbaycanla münasibətlərdə güzəştlərdən yayınmaq imkanı kimi görürsə, bu yanaşma yeni ciddi  problemlərə yol aça bilər.

Paşinyan hökuməti anlamalıdır ki, Azərbaycanla münasibətlərdə əvvəlki siyasi hesablamalara qayıtmaq mümkün deyil. Ermənistanın sülh prosesini uzatması, konstitusiya məsələsini qeyri-müəyyən saxlaması və sərhəddəki hadisələri siyasi müstəviyə daşıması qarşılıqlı etimadı zəiflədir.

İrəvan bu xətti davam etdirərsə, bölgədə gərginliyin yenidən artması ehtimalı da yüksələcək.

Sülhün taleyi Paşinyanın atacağı addımlardan asılıdır.

Jalə Rövşən