Kütləvi həbslər, SOROS qalxanı – Ermənistanda seçki öncəsi gərginlik

Ekspertlərin fikrincə, Ermənistanda bələdiyyə seçkilərində saxtakarlıq iddiaları ilə başlayan kütləvi həbslər seçki ərəfəsində arta bilər. 

Maraqlıdır, seçkidə  saxtakarlıq iddiaları real hüquq pozuntusudursa, niyə proses məhz parlament seçkiləri ərəfəsində aktiv fazaya keçib? 

Bu həbslər hakimiyyətin seçki öncəsi preventiv taktikasının elementi ola bilərmi? Bəs Beynəlxalq qurumlar niyə susur?   

Sözügedən məsələni TodayPress TV-yə şərh edən politoloq Azad Məsiyev bildirib ki, Paşinyan ABŞ və Soros dəstəyi ilə hakimiyyətə gəlib: 

"Bildiyiniz kimi, Ermənistanda Paşinyanı hakimiyyətə Amerika gətirib. Ümumilikdə Qərb koalisiyası bu işdə Paşinyana dəstək olub. Soros Fondunun maliyyə dəstəyi və Birləşmiş Ştatların diplomatik dəstəyi ilə Paşinyan hakimiyyətə gətirilib. Bu da təsadüfi deyildi. Uzun müddət idi Paşinyan Amerika xüsusi xidmət orqanları ilə əməkdaşlıq edirdi. Onu yoxladılar. Etibarlılığına inanıldıqdan sonra ona dəstək verərək Soros Fondunun dəstəyi ilə hakimiyyətə gətirdilər və Paşinyan Avropa Şurası (AŞ) qarşısında bir təlimat alıb və təlimata uyğun siyasi fəaliyyətini həyata keçirməkdədir. 44 günlük Vətən müharibəsindən sonra da seçkilər keçirildi. Soros Fondunun dəstəyi ilə Paşinyanı hakimiyyətdə saxladılar. Yəni məqsəd Amerikanın maraqlarına uyğun siyasi fəaliyyət göstərmək idi".

Onun sözlərinə görə,  ABŞ  və Qərb koalisiyası, Avropa İttifaqı yenə də Paşinyanın hakimiyyətdə qalmasında maraqlıdır. Birləşmiş Ştatların bu yaxınlarda dövlət katibinin Ermənistana səfəri Paşinyana siyasi və mənəvi dəstək vermək üçün həyata keçirilib. 

“Mətbuat konfransında da açıq şəkildə Ermənistana doqquz milyard dollar sərmayə qoyulacağı barədə bəyanat verdilər. Məqsəd erməni cəmiyyətinə bir mesajdır ki, Paşinyan hakimiyyətdə qalarsa, bu sərmayələr Ermənistana gələcək”. 

Analitik vurğulayıb ki, bu baxımdan Ermənistanda təlatüm yaşayırlar. Çünki Rusiya ilə Amerikanın maraqları Ermənistan üzərində toqquşur.  

“Paşinyanın apardığı siyasət nəticəsində balans qorunmadı. Onun açıq şəkildə amerikayönümlü siyasəti Rusiyanın maraqlarına zidd oldu. Bu baxımdan Ermənistan cəmiyyətində, daha doğrusu Ermənistanda qarşıdurma, ermənilərin, erməni lobbisinin, Avropa qanadı ilə Qərb qanadı və erməni lobbisinin Rusiya qanadı arasında bir qarşıdurma var”.  

Ekspert qeyd edib ki, Ermənistanda seçkilər ABŞ və Rusiyanın maraqlarına təsir edəcək:  

"Ermənistanda 2026-cı ilin yay ayında keçiriləcək seçkilər kimin üstünlüklə hakimiyyətə gələcəyinə dair mübarizədir. Çünki rusiyayönümlü qüvvələr hakimiyyətə gələrsə, Ermənistan vəziyyəti fərqli olacaq. Bu baxımdan uzun müddətdir ki, Amerika Ermənistan üzərində bir layihə həyata keçirir və bunu yarımçıq qoymaq istəmir; Zəngəzur dəhlizi məsələsi də həmin layihənin tərkib hissəsidir. Ümumilikdə Ermənistanda keçiriləcək seçkilər həm Rusiyanın, həm də Amerikanın maraq dairəsindədir"

Onun qənaətincə, Paşinyan öz rəqiblərini neytrallaşdırmaq istəyir. Kilsə ilə Paşinyan arasında olan qarşıdurma da buna bariz nümunədir.

A.Məsiyev əlavə edib ki, Ermənistanda radikalların hakimiyyətə gəlməsi təhlükədir: 

"Təbii ki, Ermənistanda kimin hakimiyyətə gəlməsi bu və ya digər formada Azərbaycanla Ermənistan arasında sülh sazişinə də təsir edə bilər. Avantüristlərin hakimiyyətə gəlməsi mümkündür. Deməli, onda Azərbaycanla Ermənistan arasında sülh sazişinin imzalanması və qarşıdurmanın qarşısının alınması sual altına düşür. Çünki Azərbaycanın şərtlərindən biri Ermənistanda referendum keçirib konstitusiyasına dəyişiklik etməkdir. Radikal qüvvələr, avantüristlər yenə də Böyük Ermənistan xülyası ilə yaşayırlar və Azərbaycanın torpaq iddialarından əl çəkməyəcəklər. Belə olan halda regionda yeni qarşıdurma yarana bilər, sabitlik pozula bilər və böyük dövlətlərin maraqları bu qarşıdurmaya gətirib çıxara bilər”.

Jalə Rövşən

TodayPress TV