Uşaqlarda infeksiya riskini 38% azaldan ucuz vasitə: İllik xərci 3 dollardan az...
Gündəlik 20 milliqram sink qəbulu oraqvari hüceyrə anemiyası olan beş yaşdan kiçik uşaqlarda infeksiyaların sayını 38% azaldıb.
TodayPress TV xəbər verir ki, bu nəticəyə İndiana Universitetinin Tibb Məktəbinin və Uqandadan olan həmkarlarının apardığı araşdırmada gəlinib. Tədqiqatın nəticələri “Journal of the American Medical Association” (JAMA) elmi jurnalında dərc olunub.
Oraqvari hüceyrə anemiyası eritrositlərin düzgün olmayan forma aldığı və orqanizmdə oksigeni daha çətin daşıdığı irsi qan xəstəliyidir. Bu xəstəliyi olan uşaqlarda immun sisteminin fəaliyyətində mühüm rol oynayan sink çatışmazlığına tez-tez rast gəlinir. Buna görə də onlar xəstəxanaya yerləşdirilməyə, hətta ölümə səbəb ola bilən infeksiyalara qarşı xüsusilə həssas olurlar.
Tədqiqatda Uqandanın Cinca şəhərindəki regional xəstəxanada müalicə alan 1-5 yaş arası 100 uşaq iştirak edib. Altı ay ərzində uşaqların bir hissəsi hər gün 20 milliqram sink, digərləri isə plasebo qəbul edib. Araşdırma randomizə edilmiş, ikiqat kor və plasebo-nəzarətli şəkildə aparılıb.
Sink qəbul edən uşaqlarda bütün növ infeksiyaların sayı plasebo qrupundakı uşaqlara nisbətən 38% az olub. Bunlara yuxarı tənəffüs yollarının infeksiyaları, ishal və bakterial infeksiyalar da daxil olub.
Bu, alimlərin oxşar yanaşmanı yoxladığı ikinci araşdırmadır. Əvvəlki tədqiqatda uşaqlara gündə 10 milliqram sink verilib, lakin infeksiyaların sayında nəzərəçarpacaq azalma aşkar edilməyib. Yeni nəticələr daha yüksək dozanın əhəmiyyətli dərəcədə daha effektiv ola biləcəyini göstərir.
Bununla belə, tədqiqatçılar hələlik oraqvari hüceyrə anemiyası olan uşaqların standart müalicəsinə gündəlik sink qəbulunun daxil edilməsini tövsiyə etmirlər. Əldə olunan nəticələr müxtəlif tibb mərkəzlərindən xəstələrin iştirak etdiyi daha geniş tədqiqatlarda təsdiqlənməlidir.
Potensial metodun üstünlüklərindən biri onun aşağı qiymətidir. Alimlərin hesablamalarına görə, böyük həcmdə satınalma zamanı bir uşaq üçün gündəlik sink qəbulunun illik kursunun qiyməti 3 dollardan aşağı ola bilər.
Qiymət Mahir
