İnternet yaşlı insanları depressiyadan çıxarır

Honq Konq Universitetinin alimləri müəyyən ediblər ki, müntəzəm internet istifadəsi 50 yaşdan yuxarı insanların psixi sağlamlığını yaxşılaşdırır.

TodayPress TV xəbər verir ki, nəticələr "Nature Human Behavior" (NHB) jurnalında dərc olunub.

Ümumdünya Səhiyyə Təşkilatının məlumatına görə, 55 yaşdan yuxarı insanların təxminən 14 faizi depressiya yaşayır. Bu səbəbdən mütəxəssislər psixi sağlamlığı dəstəkləmək üçün yeni və əlçatan üsullar axtarırlar. İnternet isə ünsiyyət, informasiya və əyləncə imkanları təqdim edərək yaşlı insanların rifahını artırmaq üçün perspektivli vasitə kimi ön plana çıxır.

Yeni araşdırmada 23 ölkədən 87 mindən çox iştirakçının məlumatları təhlil olunub. Yaşı 50-dən 75-ə qədər olan respondentlər internet istifadəsi, psixi sağlamlıq və fiziki vəziyyətlə bağlı sualları cavablandırıblar.

Tədqiqat nəticəsində məlum olub ki, internetdən müntəzəm istifadə edənlər özlərini daha xoşbəxt hiss edir və depressiya əlamətlərini daha az yaşayırlar. Onlarda depressiya göstəriciləri orta hesabla 0,09 bal aşağı, həyat məmnunluğu isə 0,07 bal yüksək olub. 

Türkan İsgəndərli