Hamiləlik dövründə təhlükəsiz müalicə: Alimlərdən inqilabi nano-kəşf

Beynəlxalq tədqiqatçılar qrupu hamiləlik zamanı təhlükəsiz şəkildə iltihabları müalicə etməyə imkan verəcək unikal nanodərmanlar hazırlayıb.

TodayPress TV xəbər verir ki, bu barədə məlumat “Advanced Science” (AS) jurnalında dərc olunub.

Hamiləlik dövründə yaranan iltihablar tez-tez ağırlaşmalara səbəb olur. Lakin mövcud dərmanlar bəzən effektsiz olmaqla yanaşı, döl üçün təhlükəli də ola bilər. Yeni texnologiya sayəsində nanoquruluşlu süni fermentlər (nanoenzimlər) bu problem aradan qaldırıla bilər. Nanometr səviyyəsində olan bu hissəciklər yalnız zədələnmiş toxumalarda aktivləşir, sağlam orqanlara zərər vermədən infeksiyalarla mübarizə aparır.

Tədqiqatçılar nanoenzimlərin modul strukturunu yaradıb: preparatın “davranışını” nanoyadro təyin edir, xüsusi örtük isə onun sabitliyini və dəqiqliyini artırır. Bu yanaşma sayəsində dərmanları konkret xəstəliklərə uyğun tənzimləmək mümkündür.

Alimlər təhlükəsizlik məsələsinə xüsusi diqqət yetiriblər. Tədqiqatlar yalnız hüceyrələr üzərində deyil, həm də qeysəriyyə yolu ilə doğuşdan sonra əldə edilmiş insan plasentasından istifadə olunan unikal laboratoriya modellərində aparılır. Bu, ana və dölə təsiri daha dəqiq qiymətləndirməyə imkan verir.

İlk nəticələr ümidvericidir: nanodərmanlar plasentanın fəaliyyətinə mane olmur və heç bir yan təsir göstərmir. Növbəti mərhələ bu maddələrin iltihab əleyhinə və antibakterial təsirini geniş şəkildə sınaqdan keçirmək olacaq.

Alimlər ümid edirlər ki, bu texnologiya gələcəkdə hamiləliklə müşayiət olunan bir çox xəstəliklərin müalicəsində yeni və təhlükəsiz yollar açacaq.

Qiymət Mahir