Çikaqo alimlərindən inqilabi nəticə: Diabetin müalicəsində yeni üsul sınaqdan keçdi!

Fasiləli oruc I tip diabeti olan insanlara təhlükəli fəsadların riskini artırmadan qan şəkərinin səviyyəsinə daha yaxşı nəzarət etməyə kömək edə bilər.

TodayPress TV xəbər verir ki, araşdırmanı Çikaqodakı İllinoys Universitetinin tədqiqatçıları aparıblar.

Tədqiqatda I tip diabet və piylənməsi olan 32 yetkin şəxs iştirak edib. Onlar təsadüfi şəkildə üç qrupa bölünüblər. Birinci qrup kalori hesablamadan yalnız saat 12:00-dan 20:00-dək qidalanıb, ikinci qrup qəbul etdiyi kalorilərin miqdarını 25 faiz azaldıb, üçüncü qrup isə əvvəlki həyat tərzini dəyişməyib. Təcrübə altı ay davam edib.

Səkkiz saatlıq qidalanma rejiminə əməl edən iştirakçılarda qlikozilləşmiş hemoglobinin (HbA1c) səviyyəsi kaloriləri məhdudlaşdıran qrupla müqayisədə orta hesabla 0,5 faiz bəndi azalıb.

Bununla yanaşı, tədqiqatçılar ağır hipoqlikemiya, kəskin hiperqlikemiya və ya diabetin ən təhlükəli fəsadlarından biri olan diabetik ketoasidoz riskinin artdığını müəyyən etməyiblər.

Müəlliflər qeyd edirlər ki, bu, fasiləli orucun məhz I tip diabeti olan insanlar üçün potensial təhlükəsizliyini və effektivliyini göstərən ilk klinik tədqiqatdır. Bununla belə, onlar vurğulayırlar ki, belə pasiyentlər qidalanma rejimini yalnız müalicə həkimi-endokrinoloqla birlikdə dəyişməlidirlər. Əldə olunan nəticələrin daha genişmiqyaslı tədqiqatlarda təsdiqlənməsi tələb olunur.

Bundan əvvəl hamiləlik zamanı güc məşqlərinin gestasion diabet riskini azaltdığı məlum olub.

Qiymət Mahir