Alimlər: Diş əti xəstəlikləri böyrəklərə zərər verə bilər

Diş əti xəstəlikləri xroniki böyrək xəstəliyi olan insanların vəziyyətini ağırlaşdıra bilər.

TodayPress TV xəbər verir ki, bu barədə ABŞ-də yerləşən Sinsinnati Universitetinin alimlərinin araşdırması “BMC Nephrology” jurnalında dərc olunub.

Tədqiqat göstərib ki, gingivit və parodontit kimi diş əti xəstəlikləri ilə xroniki böyrək xəstəliyi oxşar mexanizmlərlə inkişaf edir. Hər iki vəziyyət xroniki iltihab və immun sistem pozuntuları ilə əlaqəlidir.

Alimlərin sözlərinə görə, dişlərdə toplanan bakteriyalar:

— toksinlər ifraz edir

— iltihabı artırır

— bu isə təkcə ağız boşluğuna deyil, bütün orqanizmə, o cümlədən böyrəklərə təsir edir

Araşdırma, həmçinin göstərib ki, hər iki xəstəlikdən əziyyət çəkən şəxslərdə:

— şəkərli diabet

— hipertoniya daha tez-tez müşahidə olunur

Bu isə müalicəni çətinləşdirir və xəstəxanaya yerləşdirilmə riskini artırır.

Mütəxəssislər xüsusilə vurğulayır ki, dializ alan və ya böyrək transplantasiyasına hazırlaşan xəstələr üçün ağız boşluğundakı infeksiyalar ciddi risk yaradır.

Alimlər hesab edir ki, mütəmadi stomatoloji müayinə və vaxtında müalicə:

— ağırlaşmaların qarşısını ala bilər

— ümumi sağlamlıq vəziyyətini yaxşılaşdıra bilər

Onların fikrincə, stomatoloji xidmət xroniki böyrək xəstəliyinin kompleks müalicəsinin ayrılmaz hissəsinə çevrilməlidir.

Qiymət Mahir