Azərbaycan qazı Ukraynada: Moskva təşvişdə!

“Azərbaycan əvvəlcədən heç kimin qaz bazarına müdaxilə etməyib və öz istehlakçılarına, eləcə də marşrutlarına əsaslanan siyasət yürüdüb”.

Politoloq Tofiq Abbasov bunu TodayPress TV-yə açıqlamasında deyib. 

Onun sözlərinə görə, Rusiya Ukrayna ilə müharibəyə başlamazdan əvvəl qaz siyasətini problemsiz şəkildə həyata keçirib və Azərbaycanın bu prosesə nə müdaxiləsi olub, nə də qısqanclıq göstərib. Əksinə, məsələ hər zaman sağlam yanaşma ilə qarşılanıb.

“İndi isə Rusiya artıq bir çox tərəfdaşlarına qarşı narazılıq nümayiş etdirir və sanki hamının ona borclu olduğu görüntüsünü yaradır. Halbuki, Azərbaycanın Rusiya qarşısında heç bir öhdəliyi yoxdur və rəsmi Bakı həm Rusiya, həm də Ukrayna ilə balanslı münasibətə sahibdir. Buna görə də Azərbaycan Ukraynaya humanitar dəstək göstərməkdə davam edir və bu, təkcə siyasi yox, həm də insani yanaşmanın göstəricisidir. Həm də qaz məsələsi Ukraynada artıq siyasi problemə çevrilib və bazarda sıxlıq yaranıb. Azərbaycan isə bu durumda öz resurslarını ehtiyacı olan tərəflərlə bölüşür. Bu, nə üçüncü tərəflərə yönəlmiş addım, nə də hansısa siyasi planın tərkib hissəsidir. Biz sadəcə qazı insanlar üçün göndəririk, xüsusilə də qış aylarında”.

Analitik Bakı-Moskva münasibətlərdə müşahidə olunan soyuqluğun səbəbini də Moskvada görür. Xüsusilə, son təyyarə insidentindən sonra Rusiyanın susqun davranışı, Azərbaycan tərəfinin isə beynəlxalq hüquqa əsaslanan mövqe tutması bu münasibətlərin gərginləşməsinə gətirib çıxarıb. 

Politoloq əlavə edib ki, Rusiya mətbuatında Azərbaycan əleyhinə aparılan kampaniyalar, xüsusilə də Mixail Qusmanın "TASS"ın baş direktorunun birinci müavini vəzifəsindən azad edilməsi ilə bağlı səsləndirilən iddialar əsassız və qeyri-sağlamdır.

“Rusiya mediasının "Azərbaycanın Rusiyada “5-ci kolonu" var və onu təmizləyirik” kimi ittihamları siyasi ritorikadan başqa bir şey deyil. İstər qaz, istər neft, istərsə də digər resurslar üzrə əməkdaşlıq sahəsində Azərbaycan istədiyi tərəfdaşla işləmək hüququna malikdir. Bu, Azərbaycanın suveren hüququdur və heç kim Bakıya diktə edə bilməz”.  

Sonda T.Abbasov vurğulayıb ki, Azərbaycan milli maraqlarına uyğun olaraq tərəfdaşlarla münasibətləri genişləndirməyə davam edəcək və bu məsələdə hansısa siyasi məqsəd güdülmür: 

“Azərbaycan heç kimin təyyarəsini, tankını neftlə təmin etmir. Biz sadəcə sadə ukraynalıları düşünürük”, - deyə o fikirlərini yekunlaşdırıb. 

Qeyd edək ki, rusiyalı şovinist dairələr Azərbaycanı Ukraynaya qaz satdığına görə hədəfə alıblar. Belə ki, Rusiya KİV-lərinin yazdığına görə, Azərbaycan Ukraynaya qaz nəql etməklə guya Rusiya əleyhinə siyasətini gücləndirmiş olub.

Töhfə Səməd