Güneyli soydaşlarımız yad layihələrin aləti olmayacaq! – Millət vəkili
“Azərbaycan şəhərləri, xüsusən Təbriz, hələlik tam miqyasda təmkinini qoruyur. Soydaşlarımız mövcud rejimdən narazıdır və yad layihələrin aləti olmaq istəmirlər”.
Milli Məclisin deputatı Tənzilə Rüstəmxanlı bunu TodayPress TV-yə danışarkən bildirib.
Onun sözlərinə görə, İranda indiki aksiyalar həm miqyas baxımından genişlənir, həm də mahiyyətinə görə əvvəlkilərdən çox fərqlənir. Etirazlar iqtisadi səbəblərlə başlayıb, siyasi yöndə davam edir:
“Çünki 2022-ci ildəki etirazların mərkəzində daha çox qadın, həyat və azadlıq şüarları dayanır və sosial azadlıqlar ön plana çıxırdı. Hazırkı aksiyalarda isə siyasi motivlərin daha qabarıq olduğunu görürük. Əlbəttə, bu etirazlar ilk növbədə iqtisadi çətinliklərdən qaynaqlanır. Milli valyutanın — rialın kəskin dəyər itirməsi, su qıtlığı və gündəlik tələbat mallarının — çörəyin, yanacağın və s. birdən-birə həddindən artıq bahalaşması etirazlara səbəb oldu. Etirazlara səbəb olan ilkin amillər məhz bunlar idi. Lakin çox keçmədən siyasi şüarların səsləndirilməsinin şahidi olduq. Xüsusilə fars bölgələrində aksiyaların siyasi xarakteri və kəskinliyi daha açıq hiss olunur. Pəhləvi sülaləsindən Rza Pəhləvinin ölkəyə geri qayıtması ilə bağlı tələblərin səsləndirilməsi isə ayrıca diqqət çəkir. Bundan əvvəlki aksiyalarda bu cür açıq çağırışlar eşidilmirdi”.
Deputat qeyd edib ki, Soydaşlarımız etirazları milli mübarizə ilə əlaqələndirmir:
“Lakin Azərbaycan şəhərləri, xüsusən Təbriz, hələlik tam miqyasda təmkinini qoruyur. Aydın hiss olunur ki, Cənubi Azərbaycandan olan soydaşlarımız bu prosesləri daha çox fars elitasının, eləcə də İrandakı müxtəlif daxili siyasi qüvvələrin güc savaşı kimi qiymətləndirirlər. İndiki etirazların leytmotivi cənublu soydaşlarımızın milli davası, haqq və azadlıqları uğrunda apardıqları mübarizə ilə səsləşmir. 1979-cu ildə şah rejiminin devrilməsində Azərbaycanın və Təbrizin müstəsna rolu olmuşdur.
Soydaşlarımız mövcud rejimdən narazıdır və yad layihələrin aləti olmaq istəmirlər:
“Milli kimliyinin tanınması və muxtariyyət tələbləri ilə mübarizə aparan soydaşlarımız yeni hakimiyyətin gəlişi ilə heç nəyin dəyişmədiyinin acısını yaşadılar. Keçən illərdən və inqilablardan dərs çıxaran cənublu qardaşlarımız, xalqımıza pis münasibət bəsləyən molla rejimini, ondan da pis olan Pəhləvi hakimiyyətinə dəyişmək istəmirlər. Ortada başqa alternativ siyasi qüvvənin olmadığı bir reallıqda soydaşlarımız yad layihələrin aləti olmaq istəmirlər".
Parlamentari sonda qeyd edib ki, güneyli soydaşlarımız çox düzgün olaraq səbrlə gözləyir, proseslərin hansı istiqamətdə inkişaf edəcəyini müşahidə edir və ölkədə siyasi hakimiyyətin dəyişməsi labüd olacağı təqdirdə, heç şübhəsiz son sözünü deyəcəkdir. Son prezident seçkiləri də göstərdi ki, azərbaycan xalqının mövqeyi nəzərə alınmadan İranda siyasi dəyişiklik mümkün deyil.
Qeyd edək ki, İranda son etirazlar geniş miqyas alıb və ölkənin bütün 31 vilayətinə yayılıb. Aksiyalar əvvəlcə iqtisadi çətinliklər — rialın kəskin dəyər itirməsi, inflyasiya və gündəlik tələbat mallarının bahalaşması — səbəbindən başlayıb, lakin sonradan daha siyasi çağırışlarla davam edib. Etirazlar nəticəsində onlarla insan həlak olub, minlərlə adam saxlanılıb və hökumət interneti demək olar ki, tamamilə kəsib.
Jalə Rövşən
