Fransada 2026-cı ilin dövlət büdcəsi böhran astanasındadır
Fransa Milli Assambleyasında bu həftə hökumət üçün həlledici olacaq.
TodayPress TV xəbər verir ki, sosialist deputat Filipp Brən (Parti socialiste-PS) “FranceInter” radiosuna verdiyi açıqlamada xəbərdarlıq edib ki, 2026-cı il dövlət büdcəsi ilə bağlı razılıq əldə olunmasa, hökumət, hətta Milli Assambleya da buraxıla bilər.
Fransa hökumətinin taleyi büdcə səsverməsindən asılıdır.
“Əgər Milli Assambleya çərşənbə axşamına, noyabrın 4-dək razılaşma tapmasa, hər şey dağılacaq və hökumət çökəcək. Hazırda Baş nazir Sebastyən Lökornü hökumətinin taleyi sosialistlərin dərhal etimadsızlıq səsi verməməsi qərarına bağlıdır. Bu, hökumətə müvəqqəti “nəfəs alma” imkanı yaradıb. Lakin 4 noyabr, çərşənbə axşamı keçiriləcək büdcə səsverməsi “ya razılaşma, ya da böhran” mənzərəsini yaradacaq”, - deyə deputat F. Brən bildirib.
F. Brən onu da əlavə edib ki, partiyası kompromis təklifi üzərində dayanıb.
Sosialistlər hökumətə qarşı irəli sürdükləri “Zükmən” vergi (Zucman) layihəsinin yeni, daha yumşaq versiyasını təqdim ediblər. Bu təklifə əsasən, bütün sektorlar deyil, yalnız ən iri korporasiyalar bu vergi çərçivəsinə daxil ediləcək. Filipp Brən izah edib ki, startaplar — xüsusən də “Mistral” kimi texnoloji şirkətlər və “licornes” adlandırılan (dəyəri 1 milyard dollardan çox olan) 11 iri gənc şirkət bu vergidən azad ediləcək. Eyni zamanda, ailə tipli sənaye müəssisələri də vergi siyahısından çıxarılacaq. F. Brən vurğulayıb ki, bu azadolmalar yalnız o zaman tətbiq ediləcək ki, şirkətin 51 faizdən çox payı tək bir sahibkarın əlində olsun.
Fransada 2026-cı il büdcəsi ətrafında yaşanan siyasi gərginlik artıq maliyyə böhranı ilə siyasi böhranın birləşdiyi kritik mərhələyə çatıb. Nəticə isə, çoxlarının fikrincə, “Lecornu” hökumətinin taleyini müəyyən edəcək.
