Süni intellektdə yenilik
Süni intellekt kişi sonsuzluğunda yeni ümid yaratdı.
TodayPress TV xəbər verir ki, ABŞ-nin Kolumbiya Universitetinin Doğuş Mərkəzində alimlər süni intellektin köməyi ilə uzun illər uşaq sahibi ola bilməyən cütlüyün hamilə qalmasına nail olublar. Araşdırma kişi sonsuzluğunun müalicəsində mühüm irəliləyiş kimi qiymətləndirilir.
Mütəxəssislər STAR (Sperm İzləmə və Bərpaetmə) adlı texnologiya vasitəsilə sperma nümunələrindən milyonlarla şəkil toplayıb və təhlil ediblər. Süni intellekt bu görüntülər arasından ən sağlam və ən hərəkətli hüceyrələri müəyyən edərək xüsusi mikro kanallarla ayırıb.
Son dərəcə aşağı sperma sayına malik bir xəstə üzərində aparılan proses zamanı sistem təxminən 2,5 milyon görüntü arasından cəmi iki sağlam sperma hüceyrəsi tapıb. Onlardan biri ilə mayalanma uğurla baş tutub və nəticədə cütlük hamiləliyə nail olub.
Alimlər bildirirlər ki, metod böyük perspektivə malik olsa da, hələlik məhdud sayda tətbiq olunub. Bu səbəbdən onun standart müalicəyə çevrilməsi üçün geniş klinik sınaqlara ehtiyac var.
Mütəxəssislər hesab edir ki, süni intellekt əsaslı sperma seçimi gələcəkdə kişi sonsuzluğunun müalicəsində inqilabi rol oynaya bilər.
