ABŞ-də 4200 illik kəllə parçası tapıldı
ABŞ-də çay sahilində 4200 illik insan kəllə parçası tapılıb.
TodayPress TV xəbər verir ki, bu barədə "New York Post" məlumat yayıb.
Çay kənarında gəzən yerli sakin gil və köklər arasında kəllə fraqmenti görüb və dərhal polisə xəbər verib. Hadisə yerinə gələn məhkəmə-tibb mütəxəssisləri əvvəlcə bunun cinayət hadisəsi ilə bağlı ola biləcəyini düşünüblər, lakin araşdırma nəticəsində məlum olub ki, qalıqlar təxminən 4200 il əvvəl yaşamış bir insana məxsusdur.
Tapılan hissənin kəllənin arxa (oksipital) sümüyünə aid olduğu və böyüklərin ovucu ölçüsündə olduğu bildirilib. Koroner Eddi Riçardson deyib ki, həmin şəxsin cinsiyyəti hələ müəyyən edilməyib və sümükdə zorakılıq izləri yoxdur. Sümük sadəcə uzun illər ərzində su, hava və zaman təsirindən aşınıb.
Alimlər düşünürlər ki, bu insan minlərlə il əvvəl İndiana ərazisində yaşamış Şimali Amerikanın yerli xalqlarından birinə mənsub olub. İlk məskunlaşanlar bu bölgəyə təxminən 10.000 il əvvəl gəliblər.
Hazırda kəllə fraqmenti İndianapolis Universitetinin İnsanın İdentifikasiyası Mərkəzində saxlanılır. Qalıqların yaşını və qədim insanların həyat şəraitini dəqiq müəyyənləşdirmək üçün əlavə radiokarbon analizləri aparılacaq.
Türkan İsgəndərli
