DOST Agentliyinin mənfəəti 2 dəfədən çox azaldı

Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat (DOST) Agentliyi 2024-cü ili 35 min manat mənfəətlə başa vurub.

TodayPress TV agentliyin maliyyə hesabatına istinadən xəbər verir ki, bu, 2023-cü illə müqayisədə 2,3 dəfə azdır.

Ötən il DOST Agentliyinin hökumətdən alınmış subsidiyalar hesabına gəlirləri 311,401 milyon manat (əvvəlki ilə nisbətən 6,1 % az), digər gəlirləri 35 min manat (2,3 dəfə az), heyətlə bağlı xərcləri 291,219 milyon manat (7,3 % az), köhnəlmə xərcləri 7,445 min manat (12,1 % az), amortizasiya xərcləri 2,318 milyon manat (2,9 dəfə çox), icarə xərcləri 3,624 milyon manat (98,9 % çox), qısamüddətli icarələr üzrə icarə obyektlərinin təkmilləşdirilməsi xərcləri 206 min manat (7,4 dəfə çox), digər əməliyyat xərcləri 6,017 milyon manat (3,8 % çox), maliyyə xərcləri isə 572 min manat (3,1 % çox) təşkil edib.

Bu il yanvarın 1-nə DOST Agentliyinin aktivləri 137,477 milyon manat olub ki, bu da illik müqayisədə 6,3 % çoxdur. Hesabat dövründə qurumun öhdəlikləri 6,8 % artaraq 127,338 milyon manata, balans kapitalı isə 0,3 % artaraq 10,139 milyon manata çatıb.

Xatırladaq ki, DOST Agentliyi Prezident İlham Əliyevin 9 avqust 2018-ci il tarixli fərmanı ilə yaradılıb. Dövlət başçısının 10 dekabr 2018-ci il tarixli fərmanına əsasən Agentliyin Nizamnaməsi və Strukturu təsdiq olunub. Onun nizamnamə kapitalı 10 min manatdır. 9 may 2019-cu ildə ilk "DOST" mərkəzinin açılışı baş tutub.