Vergi orqanlarına müraciətlər apreldə 25 %-dən çox azalıb

Bu ilin aprel ayında Azərbaycanda vergi orqanlarına 37 341 müraciət daxil olub ki, bu da ötən ilin eyni dövrü ilə müqayisədə 25,3 % azdır. 

TodayPress TV bu barədə İqtisadiyyat Nazirliyi yanında Dövlət Vergi Xidmətinə istinadən xəbər verir. 

Məlumata görə, daxil olmuş müraciətlərdən 95,5 %-i ərizə, 4,4 %-i şikayət, 0,1 %-i təklif olub.  Müraciətlərin 80,8 %-nin baxılması hesabat dövründə başa çatdırılıb, 19,2 %-i isə hazırda icradadır. Onlardan 38-nin icrası nəzarətə götürülüb. 

Baxılması başa çatdırılmış müraciətlərdən 65,6 %-i həll olunub, 33,1 %-i barədə müvafiq izahat verilib, qalanları barəsində qanunvericiliyə uyğun tədbirlər görülüb. 

Həll olunmuş 224 sayda faktiki şikayətlər, əsasən, kameral vergi yoxlaması, vergi ödəyicisinin qeydiyyatı, sosial sığorta ödənişləri, vergi borcu (borcun silinməsi, sərəncamın götürülməsi, borcun ödənilməsinə möhlət verilməsi) şəxsi hesab vərəqələri, maliyyə sanksiyalarının silinməsi, vergi orqanlarının vəzifəli şəxslərinin hərəkəti (hərəkətsizliyi) və digər məsələlərlə bağlı olub. 

Ötən ay Dövlət Vergi Xidmətinin Aparatında müvafiq vəzifəli şəxslər ümumilikdə 86 vətəndaşı qəbul edlib.

Qəbul zamanı hər bir vətəndaşın müraciətinə fərdi qaydada yanaşılıb, onların qanuni tələblərinin müsbət həll olunması üçün lazımi tədbirlər görülüb.