Ukrayna üçün ÇƏTİN DEKABR: Görüşlər intensivləşir!

KİV-də yayımlanan məlumatlara görə, Ukrayna Prezidenti Volodimir Zelenskinin ABŞ-yə səfəri 3-5 dekabr tarixlərinə planlaşdırılıb. Həmçinin ABŞ ordusunun katibi Den Driskol 4-5 dekabr tarixlərində Rusiyaya səfər etməyi planlaşdırır.

4 dekabrdan sonra ABŞ Prezidentinin xüsusi elçisi Stiv Uitkoff və Prezident Donald Trampın kürəkəni Cared Kuşnerin də səfəri nəzərdə tutulub. Bu iki səfərin vaxtı Vaşinqtonda Ukrayna tərəfi ilə danışıqlardan asılıdır. Lakin məlumata görə, ikisi də 10 dekabrdan əvvəl baş tutacaq.

Maraqlıdır, son zamanlarda təmasların bu qədər intensivləşməsinin səbəbi nədir? Digər məsələ - böyük ehtimalla, Zelenskinin səfəri çərçivəsində əsas müzakirə mövzusu 28 maddədən ibarət sülh sənədi olacaq. Bəs bu müzakirə Ukrayna üçün necə nəticələnəcək?

Məsələ ilə bağlı TodayPress TV-yə danışan politoloq Yusif Bağırzadə bildirib ki, Zelenskinin ABŞ-yə planlaşdırılan səfəri və ABŞ ordusunun katibi Den Driskolun, eləcə də digər yüksək vəzifəli şəxslərin Rusiyaya səfəri Ukrayna münaqişəsinin yeni diplomatik mərhələyə qədəm qoyduğunu göstərir:

“Səfərlərin eyni vaxtda və intensiv şəkildə baş verməsi yalnız müharibə gedişatını deyil, həm də ABŞ və müttəfiqlərinin bu məsələyə dair strateji mövqelərini yenidən qiymətləndirməyə başlamalarının təzahürüdür. Şübhəsiz ki, Zelenskinin səfərində bir nömrəli gündəm mövzusu xeyli müzakirələrə səbəb olan “sülh sənədi” olacaq. Zelenskinin də dediyi kimi, Ukraynaya olduqca böyük təzyiqlər var və odur ki, səfər zamanı Ukraynanın maraqlarına cavab verməyən sənədin ciddi şəkildə müzakirəsi qaçılmazdır. İlkin danışıqlar, o cümlədən də Avropa İttifaqı liderlərinin mövqeləri ABŞ administrasiyasını artıq ilkin şərtlərindən bir qisminə imtinaya məcbur edib. Lakin bütün bunlara baxmayaraq, yekun sənədin Ukraynanın xeyrinə olub-olmayacağı hələ də sual altındadır”. 

Ekspertin qənaətincə, Zelenskinin ABŞ səfəri və bu səfərlə əlaqəli danışıqlar Ukrayna üçün böyük əhəmiyyət kəsb edir:

"Bu danışıqların intensivləşməsi müharibənin sona çatması və Ukraynanın gələcəyi ilə bağlı mühüm addımların atılacağına işarə edir. Lakin hər şey ABŞ-nin mövqeyindən, müttəfiqlərin Ukraynanın maraqlarını necə müdafiə etməsindən və Rusiyanın bu prosesə necə yanaşmasından asılı olacaq.

Sülh sənədinin və aparılan müzakirələrin Ukraynanın xeyrinə nəticələnməsinə gəldikdə isə, bu həm ABŞ-nin, həm də Qərb müttəfiqlərinin dəstəyinin nə dərəcədə davam etməsi ilə bağlıdır. Odur ki, ABŞ və NATO-nun strateji mövqeyi bu danışıqların nəticələrini müəyyən edən əsas amil olacaq. Ümumiyyətlə, Zelenskinin gözlənilən səfəri və Trampla aparılan danışıqlar Ukraynanın gələcəyi baxımından mühüm əhəmiyyət kəsb edir".

Qiymət Mahir

TodayPress TV