Türk konsolidasiyasından qlobal aktorluğa

"Türk Dövlətləri Təşkilatı (TDT) hazırkı dönəmdə dünyada yeni bir güc mərkəzinə çevrilmək perspektivinə və potensialına malikdir".

“Cross Media” Təhlil Mərkəzinin analitiki, siyasi şərhçi Mübariz Göyüşlü bunu TodayPress TV-yə danışarkən deyib. 

Onun sözlərinə görə, bu potensial, təşkilata üzv olan türk dövlətlərinin inkişafından qaynaqlanır. Çünki Türkiyənin hansı gücə sahib olduğunu xüsusi vurğulamağa ehtiyac yoxdur. TDT həm dünya, həm də regional miqyasda güclü aktordur. Türkiyə ilə yanaşı, Azərbaycan və Mərkəzi Asiya türk ölkələri də çox sürətlə inkişaf edir. Bu sırada, təbii ki, Macarıstanı da qeyd etmək olar.

"Beləliklə, TDT-nin çox böyük potensialı var və fəaliyyəti müsbət tempdə davam edir. Doğrudur, hazırkı dövrdə təşkilatın dünyada baş verən qlobal problemlərin və münaqişələrin həllində aktiv rol almadığının şahidi oluruq. Təəssüf ki, bunu istisna edə bilərik. Amma bu potensial və sürətli inkişaf göstərir ki, yaxın gələcəkdə TDT dünyanın aparıcı güclərindən birinə çevriləcək və qlobal problemlərin, münaqişələrin həllində aktiv iştirak edəcək".

Analitik Türk Dövlətləri Təşkilatını digər güc mərkəzləri ilə müqayisə edib:

"Avropa İttifaqı, Ərəb Dövlətləri Liqası və digər beynəlxalq təşkilatlarla müqayisədə TDT daha sürətlə irəliləyir və nəticə əldə edir. Bunun əsas səbəblərindən biri də Azərbaycanın bu proseslərə çox ciddi töhfə verməsidir. Rəsmi Bakı bu istiqamətdə olduqca aktiv rol oynayır. Azərbaycan Prezidenti İlham Əliyev də öz çıxışlarında dəfələrlə vurğulayıb ki, Azərbaycan Türk Dövlətləri Təşkilatının güclənməsi və genişlənməsi üçün daim xüsusi səy göstərir və bu prosesə həm Türkiyə, həm də Mərkəzi Asiya türk dövlətləri ilə birgə töhfə verir.

Bütün bunları ümumiləşdirərək belə nəticəyə gəlmək olar ki, TDT perspektivli qurumdur və gələcəkdə dünya miqyaslı proseslərdə daha geniş fəaliyyət göstərərək, mühüm rol oynayacaq".

Qeyd edək ki, Azərbaycan Prezidenti İlham Əliyev “Əl-Ərəbiyyə” telekanalına müsahibəsində Türk Dövlətləri Təşkilatının hazırda böyük potensiala malik olduğunu bildirib:

"Azərbaycan daim bu qurumu gücləndirməyə sadiq olub. Bu, bir növ məşvərətçi qrup, şura, ölkələr qrupu kimi fəaliyyətə başlayıb, sonra isə transformasiya edib. O, böyük potensiala malikdir".

Qiymət Mahir