Trampın Putinə qarşı “səbri”nin səbəbləri: Strateji maraqlar, diplomatik taktika və…

“ABŞ Prezidenti Donald Trampın Rusiya lideri Vladimir Putinə qarşı səbirli mövqe nümayiş etdirməsinin arxasında həm şəxsi, həm də strateji faktorlar dayanır”.

Politoloq Tural İsmayılov bunu TodayPress TV-yə açıqlamasında deyib.   

Onun sözlərinə görə, birinci amil Trampın liderlik təcrübəsidir:

"Tramp yaxşı bilirdi ki, tələsik verilən qərarlar geopolitik riskləri artırır. İkinci mühüm amil isə iqtisadi maraqlardır. ABŞ ilə Rusiya arasında enerji və ticarət sahəsində müəyyən tarazlığın qorunması vacibdir. Trampın sanksiyaları indiyə qədər təxirə salması həm də diplomatik manevr üçün imkan yaradırdı. Bununla da o, Putini müəyyən güzəştlərə getməyə məcbur etməyi planlaşdırırdı. Üçüncü factor isə Trampın şəxsi liderlik tərzidir. O, həmişə “güc üzərindən razılaşma” prinsipinə üstünlük verib". 

Analitikin fikrincə, Trampın səbirli davranışı həm də ABŞ-dəki daxili siyasi dinamika ilə əlaqədardır. Eyni zamanda, Tramp Moskva ilə dialoqu ön plana çıxararaq Vaşinqtonun beynəlxalq nüfuzunu qorumaq və möhkəmləndirmək istəyir. Bu, eyni zamanda, informasiya strategiyasıdır.  Media və siyasi opponentlərə qarşı manevr üçün vaxt qazanmaq deməkdir. Putinin mövqeyi hələ də sərt olduğundan, Tramp konkret addımlara keçmək üçün şəraitin yetkinləşməsini gözləyir. 

“Tramp həmçinin Putinin davranışlarını düzgün analiz edir və onunla şəxsi münasibətlərindəki nüansları da nəzərə alır. Regiondakı strateji balans, xüsusilə Cənubi Qafqaz və Ukrayna məsələləri də Trampın hesablamalarının bir hissəsidir. Onun səbrli siyasəti həm də geopolitik mesaj daşıyır: ABŞ dərhal təzyiq göstərməyəcək, lakin güzəştə də getməyəcək. Bu yanaşma Putini uzunmüddətli danışıqlara cəlb etmək üçün taktiki üstünlük yaradır. Digər tərəfdən, Tramp Avropa liderləri və NATO ilə əlaqələri koordinasiya etmək, paralel olaraq enerji bazarındakı maraqları qorumaq məqsədilə zamana ehtiyac duyur”. 

T.İsmayılov yekun olaraq bildirib ki, Trampın səbr nümayiş etdirməsi onun liderlik xüsusiyyətləri, strateji hədəfləri, daxili siyasi balansı və qlobal diplomatik manevrləri ilə bağlı çoxqatlı bir siyasətin tərkib hissəsidir.

Qeyd edək ki, iyulun 28-də ABŞ Prezidenti Donald Tramp jurnalistlərə açıqlamasında Rusiya ilə danışıqlarda irəliləyiş olmadığını və atəşkəs üçün son müddəti 10-12 günə endirdiyini demişdi. Bu müddət avqustun 8-də başa çatdı. Ardınca Tramp Rusiya Prezidenti Vladimir Putinlə görüşəcəyini elan etdi. Liderlərin avqustun 15-də Alyaskada baş tutan görüşü zamanı mətbuata açıqlama verilmədi. Lakin sonradan Tramp sosial media hesabında Ukraynanın sülh qarşılığında NATO-dan və Krımdan imtina etməli olduğunu bəyan etdi. 

Qiymət Mahir