Səudiyyə husilərə nə qədər tab gətirəcək ? - AÇIQLAMA
Husilər Bab əl-Məndəb boğazına nəzarəti ələ keçirdi.
Sual yaranır, Səudiyyə Ərəbistanı Bab əl-Məndəb boğazına yaxın ərazilərdə husilərin mövqelərinin güclənməsi ilə uzun müddət yaşaya bilərmi? Riyadın husiləri tamamilə sıradan çıxarmaq əvəzinə onları məhdudlaşdırmağa yönəlmiş siyasəti gələcəkdə Səudiyyənin Bab əl-Məndəb üzərindəki strateji təsirinin zəifləməsinə səbəb ola bilərmi?
Sözügedən mövzu ilə bağlı politoloq Sədrəddin Soltan TodayPress TV-yə danışıb.
O qeyd edib ki, ötən gün Səudiyyə Ərəbistanının vəliəhdi, şahzadə Məhəmməd bin Salman Misirə səfər edib. Səfər çərçivəsində Bab əl-Məndəb boğazı ilə bağlı məsələlər də müzakirə olunub.
O nəzərə çatdırıb ki, Misir də bu məsələyə imkanları daxilində müdaxilə etməli olacaq.
Politoloq digər tərəfdən, Yəmənlə bağlı prosesə ABŞ-nin müdaxiləsinin də gözlənilən olduğunu deyib:
"Səudiyyə Ərəbistanının əsas neft ixrac marşrutlarından biri bu boğazdan keçir. Eyni zamanda, Süveyş kanalına gedən əsas dəniz yolu da Bab əl-Məndəb boğazından keçir. Odur ki, husilərin bu akvatoriyaya uzun müddət nəzarət etməsi ehtimalı azdır".
Analitik bildirib ki, əgər bu vəziyyət uzun müddət davam edərsə, husilərə kənar dəstəyin olması ehtimalı artır:
"Xüsusilə Çin, Rusiya və İran tərəfindən verilən dəstək burada nəzərə alına bilər. Bab əl-Məndəb boğazına husilərin nəzarət etməsi regionda vəziyyəti gərginləşdirməklə yanaşı, qlobal ticarətə də mənfi təsir göstərir. Odur ki, cəbhələrdə husilərə qarşı hərbi əməliyyatların başlanacağı da istisna edilmir".
Jalə Rövşən
