Ramiz Yunus: "Sülh prosesi Azərbaycanın zəfəri ilə başladı"

"Azərbaycan Prezidenti ilk olaraq müharibədə, 8 avqustda isə sülh gündəmində qələbə qazandı. Ermənistan Azərbaycanın bütün şərtlərini qəbul etdi".

TodayPress TV xəbər verir ki, Xəzər Universitetinin siyasi elmlər üzrə professoru Ramiz Yunus bunu öz "Facebook" hesabında yazıb.

O bildirib ki, Kremlin uzun illər müstəsna olaraq Azərbaycan və Ermənistana qarşı "kök və çubuq" kimi istifadə etdiyi bu prosesdən Rusiya və şəxsən prezident Putin kənara çəkilib.

"Prezident Tramp qarant rolunda çıxış edib. Şübhə etmirəm ki, bütün bunlar Kremldəki rejimin xoşuna gəlmir. Təsadüfi deyil ki, Rusiya son zamanlar açıq şəkildə Azərbaycanla üz-üzə gəlir, ölkəmizə qarşı təxribatlar törədir.

Rusiya Ukraynanın Odessa qaz nəqli sistemi ilə ixrac edilən Azərbaycan neftini qəsdən bombalayır, ötən gün isə SOCAR-ın yanacaqdoldurma məntəqəsinə növbəti dəfə zərbə endirilib.

Onu da xatırladaq ki, bundan əvvəl Azərbaycanın Ukraynadakı səfirliyi istiqamətində raket zərbəsi endirilib, daha sonra SOCAR-ın ofisinin yaxınlığına raket düşüb".

Ekspert diqqətə çatdırıb ki, bütün bunlar Rusiyanın Azərbaycanın Ukraynadakı fəaliyyətinə qəsdən zərbə vurduğunu və ölkəmizə qarşı düşmənçilik nümayiş etdirdiyini sübut edən faktlardır.

O əlavə edib ki, 2024-cü ilin dekabrında mülki AZAL təyyarəsinin vurulması ilə bağlı faciə və son Yekaterinburq hadisələri də Azərbaycana qarşı düşmənçiliyin təzahürüdür.

"Bu gün Rusiyanın həm postsovet məkanında, həm də ondan kənarda digər ölkələrə və xalqlara etdiklərini nəzərə alsaq, qardaş Ukrayna xalqına qarşı törətdiyi qəddarlıqda təəccüblü heç nə yoxdur. Rusiyanın düşdüyü biabırçı vəziyyət həm də onun postsovet məkanında Ermənistandan sonra ikinci işğalçı dövlətə çevrilməsidir.

O da çox rəmzidir ki, Azərbaycan və Ermənistan liderlərinin Ağ Evdə görüşü və imzalanmış tarixi sənədlər 2025-ci il avqustun 8-də, Rusiyanın Gürcüstana qarşı müharibəsinin ildönümündə - 2008-ci il avqustun 8-də baş tutub. Məhz o zaman bütün dünya Kremldəki mövcud rejimin əsl imperial mahiyyətini gördü. Təəccüblü deyil ki, Ukraynada genişmiqyaslı müharibə başladıqdan sonra Rusiyanın aqressiyası daha da artdı".

Ekspert vurğulayıb ki, postsovet məkanı tamamilə Ukrayna xalqının tərəfindədir və Rusiyanın təsir aləti hesab etdiyi MDB-nin vəziyyəti də Rusiyada mövcud hakimiyyətin toxunduğu hər şeyin sadəcə olaraq dağılması tezisini təsdiqləyir.

"Moldova onu tərk etdi, Azərbaycan onun tədbirlərində iştirak etmir. Baş nazirin müavini Yaqub Eyyubov MDB İqtisadi Şurasının bu yaxınlarda keçirilən iclasına məhəl qoymadı və başqaları da bu addımı izləyir. Təəssüf ki, müasir dünyada qanunun qüvvəsi artıq işləmir, Rusiya kimi ölkələrə qarşı güc hüququ sivil dünya tərəfindən hələ yetərincə nümayiş etdirilmir.

Ona görə də postsovet məkanında bütün ölkələr Rusiyanın Ukraynaya təcavüzü prizmasından gedən geosiyasi proseslərlə bağlı çox ayıq olmalıdır. Kreml güc yolu ilə, həqiqətən də sülhə məcbur edilməyincə, postsovet məkanında sülh olmayacaq. Yalnız bundan sonra Rusiyanın həm vurulan mülki təyyarə ilə bağlı, həm də Rusiyadakı Azərbaycan diasporunun nümayəndələrinə qarşı yaratdığı bütün kabusla bağlı Azərbaycanın ədalətli tələblərini yerinə yetirməyə başlaması, həmçinin soyğunçu siyasətindən əl çəkməsi mümkün olacaq".

Professorun fikrincə, Ağ Evdə tarixi imzalanma və orada verilən bəyanatlar böyük nikbinlik və ümid doğurur ki, Rusiyanın Cənubi Qafqazda uzunmüddətli ekspansiyası başa çatır.

Onun sözlərinə görə, Cənubi Qafqazda sülhün bərqərar olması üçün tunelin sonunda nəhayət işıq görünür və bu, Rusiyanın, yaxud İranın xoşuna gəlməsə də, onlar bu tarixi prosesi dayandıra bilməyəcəklər.

"Bu gün hamı dərk edir ki, Cənubi Qafqazda sülh prosesinin gerçəkləşməsinə yalnız Azərbaycanın İkinci Qarabağ müharibəsindəki tarixi qələbəsi kömək edib. Qarşıda çətin bir yol var və Azərbaycan ilə Ermənistan xalqları çox ağrılı barışıq prosesindən keçməli olacaqlar. Lakin böyük hərbi strateq Karl fon Klauzevitsin dediyi kimi: “Qədim zamanlardan yalnız böyük qələbələr böyük nəticələrə gətirib çıxarıb", - deyə Ramiz Yunus fikrini tamamlayıb.

Türkan İsgəndərli