“Müharibəyə hazır olun” - ABŞ NATO ölkələrinə səsləndi

ABŞ NATO ölkələrini Rusiyanın mümkün hücumuna qarşı müdafiə hazırlığını və hərbi istehsal imkanlarını sürətləndirməyə çağırıb.

TodayPress TV xəbər verir ki, bu barədə ABŞ-nin NATO-dakı səfiri Mett Uitaker “USA Today”ə müsahibəsində bildirib. 

O bildirib ki, Rusiya Prezidenti Vladimir Putinin nə zaman hansı addımı atacağını əvvəlcədən proqnozlaşdırmaq mümkün deyil. Buna görə də alyans ölkələri mümkün hücuma hazır olmalı və Rusiyanı belə bir addımdan çəkindirmək üçün kifayət qədər hərbi imkanlara malik olmalıdır.

Uitaker qeyd edib ki, Rusiyanın Ukraynaya qarşı müharibəsi NATO ölkələri üçün ciddi xəbərdarlıqdır. Onun sözlərinə görə, alyans ölkələri hərbi təlimləri artırmalı, müdafiə imkanlarına daha çox sərmayə qoymalı və silah-sursat istehsalını sürətləndirməlidir.

Məlumata görə, ABŞ kəşfiyyatının sızdırılmış qiymətləndirmələrində Rusiyanın qarşıdakı illərdə NATO üzvü olan ölkələrdən birinə məhdud hücum, o cümlədən quru müdaxiləsi və ya kiberhücum həyata keçirə biləcəyi bildirilib. Bu qiymətləndirmə bəzi Avropa rəsmilərini narahat edib.

NATO ölkələri ötən il 2035-ci ilədək ümumi daxili məhsulun 5 faizini müdafiəyə ayırmaq barədə razılığa gəlib. Bunun 3,5 faizi birbaşa hərbi xərclərə, qalan hissəsi isə yollar, körpülər, hava limanları və digər infrastruktur layihələrinə yönəldilməlidir.

ABŞ rəsmiləri hesab edirlər ki, NATO ölkələri bu hədəflərə daha sürətlə çatmalıdır. Səbəb kimi Rusiyanın hərbi istehsal imkanlarını sürətlə genişləndirməsi göstərilir.

ABŞ-nin  Strateji və Beynəlxalq Araşdırmalar Mərkəzinin nümayəndəsi Maks Berqmann Rusiyanın “müharibə rejimində” olduğunu, NATO ölkələrinin isə əsasən sülh dövrü iqtisadiyyatı ilə fəaliyyət göstərdiyini bildirib.

Eyni zamanda, ABŞ Mərkəzi Kəşfiyyat İdarəsinin direktoru Con Retkliffin avqustun sonunda Moskvaya gözlənilməz səfəri də NATO daxilində narahatlıq yaradıb. Məlumatlara görə, Retkliff Rusiyaya NATO ərazisinə hücumla bağlı xəbərdarlıq edib.

Rusiya isə NATO-ya hücum hazırladığı barədə xəbərləri rədd edib. Kremlin sözçüsü Dmitri Peskov bu məlumatların “reallığa əsaslanmadığını” və Rusiyanın niyyətlərini əks etdirmədiyini bildirib.

ABŞ Prezidenti Donald Tramp da avqustun 27-də Putinin NATO ərazisinə hücum etməyəcəyini deyib.

Bununla belə, görünür ki, Avropa rəsmiləri Rusiyanın artıq NATO ölkələrinə qarşı hibrid əməliyyatlar həyata keçirdiyini düşünür. Almaniya, Rumıniya və Estoniya rəsmiləri son dövrdə baş verən pilotsuz uçuş aparatı insidentlərində Rusiyanın mümkün roluna diqqət çəkiblər.

Ekspertlərin fikrincə, Rusiya hazırda Ukraynadakı müharibəyə görə NATO ilə birbaşa qarşıdurmaya girməkdə maraqlı deyil. Lakin müharibənin başa çatması və Rusiya ordusunun yenidən təşkilatlanması halında təhlükə arta bilər.

ABŞ-nin NATO-dakı keçmiş səfiri Kurt Volker isə  hesab edir ki, Ukraynadakı döyüşlərin başa çatmasından sonra Rusiyanın NATO-ya qarşı ciddi hərbi əməliyyat keçirməsi üçün 3-5 il lazım ola bilər.

Karnegi Beynəlxalq Sülh Fondunun eksperti Maykl Kofman da Rusiyanın hərbi qüvvələrinin yenidən bərpasının “nə vaxt baş verəcəyindən” danışmağın daha doğru olduğunu bildirib.

Onun sözlərinə görə, Rusiya artıq pilotsuz uçuş aparatları, dəqiq zərbə imkanları və yeni hərbi texnologiyalar sahəsində ciddi təcrübə toplayıb.

Jalə Rövşən