Miqrasiya əleyhinə etirazlar: Azərbaycana hansı təsirləri olacaq?
Niderland və Avropada sağçı populizmin yüksəlişi, miqrasiya əleyhinə etirazlar müşahidə olunur.
Nəzərə almaq lazımdır ki, Avropada azərbaycanlı diasporlar var və bu məsələdə miqrantlar təzyiqlərlə qarşılaşa bilər.
Ümumiyyətlə, Qərbin miqrasiya siyasətinin Cənubi Qafqaza, konkret olaraq isə Azərbaycana təsirləri nələr ola bilər?
Bu siyasi dalğa Avropa İttifaqının ümumi miqrasiya siyasətini mənfi mənada dəyişdirə bilərmi?
“Dünya çalxalanır”
Bu sözləri TodayPress TV-yə Milli Məclisin deputatı Vüqar İskəndərov deyib.
Onun sözlərinə görə, dünyada siyasi arxitektura yenidən qurulur və tamamilə yeni dəyərlər yayılır:
“Rusiya–Ukrayna müharibəsi, İsrail və Fələstinin kəskin qarşıdurması, Latın Amerikasındakı problemlər, Yaxın Şərqdəki digər bölgələrdə terror və təhdidlər artıq onu deməyə əsas verir ki, dünya çalxalanır, yeni dəyərlər yaranır” , – deyə o bildirib.
“Yaxın Şərq və Afrikadan sonsuz axınla gələn miqrantlar daha çox Avropaya üz tuturlar”
Parlamentari miqrasiya probleminin dünyada hazırda ən böyük problem olduğunu vurğulayıb:
“Avropada uzun illər oturuşmuş siyasi, hərbi və humanitar dəyişikliklər, o cümlədən pozuntular mövcuddur. Ancaq ən böyük problem miqrasiya problemidir. Əsasən də Yaxın Şərq və Afrikadan sonsuz axınla gələn miqrantlar daha çox Avropaya üz tuturlar. O cəmiyyətlərdə də buna görə narazılıqlar baş qaldırır. Hazırda daha çox Şərqi Avropa ölkələri radikal miqrasiya siyasəti həyata keçirirlər. Ən çox miqrant axını Almaniya, Fransa və İtaliyaya yönəlir. Bu ölkələrdə zaman-zaman əhalinin hökumətə qarşı dirənişi görünür, siyasətin sərtləşməsi tələb olunur”.
Deputat sağçı qüvvələrin populizmindən də söz açıb:
“Ancaq uzun zamandır ki, Avropada digər bir narahatlıq doğuran məqam sağçı qüvvələrin aktivləşməsidir. Bu isə daha çox Niderlandda görünür. Sağçıların populist çıxışlar etməsi, onların yüksəlişi və əsasən də narazı əhalinin maraqlarını ifadə etmələri populyarlığa gətirib çıxarır. Digər tərəfdən, bir çoxunda ksenofobiya meyllərinin olduğu görünür. Hətta islamofobiya və türklərə qarşı yönəlmiş fobiyalar da açıq-aşkar sezilir”.
“Azərbaycan tarixən tolerant dövlət olub”
Vüqar İskəndərov məsələ ilə bağlı son olaraq bildirib:
“Qərb miqrasiya siyasətində hələlik tam mövqeyini aydınlaşdırmayıb. Düşünürük ki, bu siyasətin Cənubi Qafqaza, konkret olaraq Azərbaycana təsirləri mümkün deyil. Çünki səbəb birdir: Azərbaycan tarixən tolerant dövlət olub. Bütün dinlərin, xalqların qardaş kimi yaşadığı sabitlik adası olub Azərbaycan. Bu gün sözün əsl mənasında ölkəmiz bu sahədə də dünyada nümunəvi ölkələrdən biridir. Ancaq texnologiyanın, elmin sürətli inkişafı dəyərləri də sərhədsiz edir və bir çox istəmədiyimiz dəyərlər də sərhədləri aşaraq yayılır. Belə məsələlərdə diqqətli olmalıyıq. Gənclər və yeniyetmələrlə bu istiqamətdə işləməyimiz vacibdir. Belə həssas məsələlərdə hər şeydən razı olaraq dayanmaq olmaz”.
Orxan Saffari
FOTOLAR
