Liderlər İrəvana dəvət olundu: Tərəflərin cavabı nə olacaq?
Azərbaycan və Türkiyə prezidentləri gələn ilin yazında keçiriləcək VIII Avropa Siyasi Birliyinin sammitində iştirak etmək üçün İrəvana dəvət olunublar. Ermənistanın xarici işlər naziri Ararat Mirzoyan dəvətin hələlik şifahi şəkildə göndərildiyini qeyd edib.
Bu, Türkiyə və Azərbaycanla münasibətlərin bərpa olunmasının Ermənistanın əsas prioritetlərindən biri olduğunu bir daha sübut edir.
Maraqlıdır, qardaş ölkələrin rəsmi İrəvanın bu dəvətinə cavabı necə olacaq?
Politoloq Yusif Bağırzadə bu barədə TodayPress TV-yə danışarkən bildirib ki, həm Türkiyə, həm də Azərbaycan qonşu dövlətlərlə, o cümlədən əvvəllər ciddi problemlər yaşadığımız Ermənistanla münasibətlərin normallaşmasında maraqlıdır:
“Azərbaycan Prezidenti İlham Əliyevin Qazaxıstana səfəri çərçivəsində tranzit yolu ilə Qazaxıstandan Ermənistana daşınan yüklərin blokadası aradan qaldırıldı və artıq Qazaxıstan məhsulları, xüsusilə də taxıl məhsulları sərbəst şəkildə Ermənistana ixrac olunur. Bununla yanaşı, Türkiyə də Ermənistanla münasibətlərin normallaşmasında maraqlıdır. Belə ki, bir müddət öncə Türkiyənin Ermənistanla münasibətlərin normallaşdırılması üzrə xüsusi nümayəndəsi Serdar Kılıç və Ermənistan tərəfinin xüsusi nümayəndəsi Ruben Rubinyan Ermənistan-Türkiyə sərhədində yerləşən "Marqara" sərhəd-keçid məntəqəsində görüşdülər və hər iki tərəf bu görüşü müsbət dəyərləndirdi”.
Ekspert hesab edir ki, Azərbaycan və Türkiyə Ermənistanın hər hansı dövlətin, xüsusən də Rusiyanın təsir dairəsindən çıxmasını istəyir:
“Həm Azərbaycan, həm də Türkiyə üçün Ermənistanın tranzit yollarının blokadadan çıxması, eyni zamanda bu ölkədə Azərbaycana qarşı revanşist və şovinist əhval-ruhiyyənin azalması vacibdir. Digər tərəfdən, Zəngəzur dəhlizi ilə bağlı real işlərə başlanması artıq zəruridir ki, Prezident İlham Əliyevin də dediyi kimi, 2028-ci ilin sonuna qədər bu yol istismara verilə bilsin”.
Y.Bağırzadə vurğulayıb ki, "Avropa Siyasi Birliyi”nin sammitində iştirakla bağlı qərarı dövlət başçıları verəcək. Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyevin Ermənistana səfəri iki dövlət başçısının siyasi qərarından və diplomatik protokolundan asılıdır. Analitik düşünür ki, bütün hallarda prosesə müsbət baxıb onun uğurla nəticələnəcəyinə inanmalıyıq.
Qiymət Mahir
