Kremlin “Stepanakert” oyununa Bakıdan SƏRT TƏPKİ: “Bu, hörmətsizlikdir!”

“Rusiya Federasiyasının rəsmi dövlət agentliyi olan TASS-ın Xankəndidə erməni əsilli marinist rəssam İvan Ayvazovskinin abidəsinin sökülməsi ilə bağlı yayımladığı materialda Azərbaycanın Xankəndi şəhərinin Stepanakert adlandırılması, daha sonra isə yazının sərlövhəsində dəyişiklik edilərək “Stepanakert” sözünün “Xankəndi” yox, “Dağlıq Qarabağ” ifadəsi ilə əvəzlənməsi rəsmi Kremlin mövqeyi kimi qiymətləndirilməlidir”. 

Politoloq Rəşad Bayramov bunu TodayPress TV-yə açıqlamasında bildirib.

O, bu addımı Rusiyanın Azərbaycana qarşı başlatdığı planlı kampaniyanın bir hissəsi kimi qiymətləndirib:

“AZAL-a məxsus “Embraer E190” təyyarəsinin Qroznı səmasında vurulması, Rusiyada yaşayan soydaşlarımıza qarşı qanunsuzluqlar, iş adamlarımıza və diaspora nümayəndələrimizə edilən hücumlar, eləcə də Rusiyanın müxtəlif media qurumlarında rəsmi şəxslər tərəfindən Azərbaycana qarşı səsləndirilən təhdid və təhqirlər birbaşa rəsmi Kremlin mövqeyidir. 

Rusiya yaxşı bilir ki, Azərbaycanda “Stepanakert” adlı yer mövcud deyil. Bu ifadənin işlədilməsi Azərbaycanın ərazi bütövlüyünə qarşı açıq-aşkar hörmətsizlik və siyasi mövqe nümayişidir. Bu baxımdan Azərbaycan Xarici İşlər Nazirliyinin məsələ ilə bağlı ortaya qoyduğu mövqe tamamilə əsaslı və məntiqlidir”.

Analitikin fikrincə, Rusiya bu təzyiq kampaniyası ilə təkcə Azərbaycanda deyil, ümumilikdə Cənubi Qafqazda itirdiyi mövqeləri bərpa etməyə çalışır. Lakin rəsmi Moskva təzyiq yolu ilə heç bir nəticə əldə edə bilməyəcəyini qəbul etmək istəmir. Azərbaycan indiyə qədər bu cür cəhdlərin heç birinə boyun əyməyib.

Ekspertə görə, Rusiya Azərbaycan və digər ölkələrlə münasibətlərdəki gərginliyi aradan qaldırmaq istəyirsə, ilk növbədə öz mövqeyinə yenidən baxmalı, təzyiq yolunu deyil, üzərinə düşən öhdəlikləri yerinə yetirməyi seçməlidir. 

“Rusiyanın “rəsmi” və “qeyri-rəsmi” hücumlarının hamısı eyni siyasi mərkəzdən idarə olunur. “Qeyri-rəsmi” ona görə ki, media qurumları nə qədər müstəqil olduqlarını iddia etsələr də, faktiki olaraq birbaşa Kremlin təsiri altındadırlar. Rusiya Prezidenti Vladimir Putinin hakimiyyəti dövründə ölkədə müstəqil medianın varlığından danışmaq isə sadəlövhlük olar", - deyə analitik öz fikirlərini yekunlaşdırıb.

Qeyd edək ki, iyulun 31-də Rusiya Federasiyasının TASS informasiya agentliyi “Stepanakertdə Ayvazovskinin abidəsi söküldü” sərlövhəli xəbər yayıb. Maraqlısı odur ki, bu, uzun illər agentliyin rəhbərliyində yer alan Mixail Qusmanın vəzifədən uzaqlaşdırılmasından dərhal sonra baş verib. 

Məsələyə münasibət bildirən Azərbaycan Xarici İşlər Nazirliyinin mətbuat katibi Ayxan Hacızadə bildirib ki, Rusiya Federasiyasının rəsmi dövlət agentliyi olan TASS-da Azərbaycanın Xankəndi şəhərinin Stepanakert adlandırılması ölkəmizin ərazi bütövlüyünə hörmətsizlik və təhqiramiz addım kimi qiymətləndirilir.

Həmçinin, Azərbaycan Dövlət İnformasiya Agentliyi – AZƏRTAC Rusiyanın TASS agentliyinə rəsmi etiraz bəyanatı yayıb. Bildirilib ki, bu ad erməni bolşevik lideri və azərbaycanlılara qarşı qətliamlarla tanınan Stepan Şaumyana istinadən istifadə olunur və bu addım Azərbaycan xalqının hisslərinə qarşı hörmətsizlikdir. 

Qiymət Mahir