"Hörümçək toru" əməliyyatının arxasında kim durur? – ŞOK AÇIQLAMA

“Ukraynanın "Hörümçək toru" əməliyyatını ölkə lideri Volodimir Zelenski təkbaşına planlamayıb. Onun arxasında daha böyük qüvvələr durur”.

Politoloq Azad Məsiyev bunu TodayPress TV-yə danışarkən deyib. 

Onun sözlərinə görə, "Hörümçək toru" əməliyyatına adi bir hərbi taktika kimi yox, daha dərin geosiyasi və strateji maraqlar fonunda baxmaq lazımdır.

"Əməliyyatın yüksək peşəkarlıqla icra olunması göstərir ki, Rusiya xüsusi xidmət orqanları bu proseslərdə ya passivdir, ya da proseslərə gec reaksiya verir. Halbuki, ortada faktiki olaraq Rusiya ilə NATO arasında açıq olmayan, amma geniş miqyaslı müharibə gedir. Eyni zamanda, Zelenski əməliyyata görə məsuliyyəti öz üzərinə götürsə də, bu, onun səlahiyyət və imkanlarını aşan bir hərbi-siyasi gedişdir. Əməliyyatın miqyası və məqsədləri onu göstərir ki, bu, daha çox ABŞ və NATO-nun maraqlarına uyğun planlaşdırılmış və həyata keçirilmiş strategiyadır. Sözsüz ki, bu iki qüvvənin Uraynanı önə çəkərək "hörümçək toru" əməliyyatını həyata keçirməsinində özünə görə səbəbi var. Rusiyanın nüvə doktrinasına dolayısı zərbə vurmaqla NATO bloku Moskvanı hərbi və psixoloji cəhətdən zəiflətməyə çalışır. Bu cür mürəkkəb və texnoloji dəqiqlik tələb edən əməliyyat Ukraynanın təkbaşına icra edə biləcəyi bir missiya deyil. Burada kosmik kəşfiyyatdan tutmuş, informasiya müharibəsi texnologiyalarına qədər geniş imkanlardan istifadə olunub. Bu isə əməliyyatın arxasında Qərb kəşfiyyat strukturlarının dayanması ehtimalını gücləndirir".

Analitikin fikrincə, bu hücumun əsas məqsədi Rusiyanı sülhə məcbur etmək deyil. Əksinə, bu, Rusiya dövlətinin nüvə təhlükəsizlik sistemini sarsıtmaq və ölkənin imicinə zərbə vurmaq üçün atılmış addımdır. Məhz bu səbəbdən də əməliyyatdan dərhal sonra Qərb mediasında Rusiyaya qarşı psixoloji basqılar daha da gücləndi. “Şimal Axını-2” kəmərinə edilən hücumu da eyni strateji xəttin bir hissəsi kimi dəyərləndirilməlidir. Bu kimi addımlar Rusiya dövlətini zəiflətmək məqsədi güdür və Ukrayna bu planlarda yalnız alət funksiyasını yerinə yetirir.

"Rusiya bu əməliyyata qarşı cavab tədbiri görəcək. Lakin bu cavabın miqyası və səviyyəsi zamanla aydınlaşacaq. Böyük Britaniyanın "Hörümçək toru" əməliyyatından dərhal sonra müdafiə hazırlığını gücləndirməsi də bu gərginliyin Qərbdə ciddi qarşılandığını göstərir. NATO-nun getdikcə daha çox birbaşa hərbi münaqişəyə yönəldiyi, Avropa İttifaqının isə münaqişənin uzanmasında maraqlı olduğu artıq bəlli məsələdir. Bu kurs həm Rusiyanı iqtisadi və hərbi baxımdan zəiflətmək, həm də yeni psixoloji hücum strategiyalarına zəmin yaratmaq məqsədi daşıyır".

Sonda o, diqqətə çatdırıb ki, bu əməliyyatlar Rusiyanın nüvə doktrinasına birbaşa təhdiddir. Nüvə doktrinasına edilən hər hansı müdaxilə isə Moskvanın sərt və adekvat cavabı ilə nəticələnə bilər. Bu isə təkcə Rusiya və Qərb üçün deyil, bütün bəşəriyyət üçün ciddi təhlükələr doğura bilər. 

"Avropanın hazırkı siyasəti sülhə deyil, qlobal xaosa xidmət edir", - deyə politoloq nitqini yekunlaşdırıb.

Qeyd edək ki, Ukrayna Təhlükəsizlik Xidmətinin iyunun 1-də həyata keçirdiyi “Hörümçək toru” əməliyyatı nəticəsində Rusiyanın strateji bombardmançıları da daxil olmaqla, 41 təyyarəsi məhv edilib.  

Töhfə Səməd