"Fakt ört-basdır edilir" — İran-Polşa gərginliyi ARTIR
İranın xarici işlər naziri Abbas Əraqçi Polşanın Tehranı Rusiyaya pilotsuz uçuş aparatları tədarük etməkdə ittiham etməsinə cavab verib.
Polşa XİN rəhbəri Radoslav Sikorskinin bəyanatını "əsassız" adlandıran Əraqçi qarşı tərəfi sənədlərlə əsaslandırılmış dialoqa çağırıb:
“Hesab verməkdən qaçmaq, əsassız iddiaları və müdaxiləçi bəyanatları təkrarlamaq problemi həll etməyəcək".
Nazir tarixi nümunə gətirərək iddia edib ki, İkinci Dünya Müharibəsi dövründə İran 100 mindən çox polşalıya sığınacaq verib və onların azad ordusunun qurulmasına yardım edib:
“İran və Polşa xalqları arasında dostluq çətin günlərdə öz sözünü deyib. Bu irsi qorumaq borcumuzdur”.
Polşanın ittihamı əsaslıdırmı? Ümumiyyətlə, Tehrana qarşı bu cür ittihamla çıxış etməsinin səbəbi nədir?
Məsələ ilə bağlı TodayPress TV-yə danışan Ədalət, Hüquq, Demokratiya Partiyasının (ƏHD) ictimai-siyasi əlaqələr üzrə katibi, politoloq Azər Qasımov bildirib ki, hamının bildiyi faktı Polşanın xarici işlər naziri səviyyəsində bəyan etmək İranın Rusiyaya pilotsuz uçuş aparatları verməsi gerçəyini dəyişmir:
"Bu, artıq təsdiqlənmiş faktdır və əlavə sübuta ehtiyac yoxdur. İran XİN rəhbəri Abbas Əraqçinın bu faktı ört-basdır etməyə yönəlmiş bəyanatı isə açıq siyasi riyakarlıqdır. Rusiyaya bu texnologiyanın ötürülməsi məhz İran tərəfindən həyata keçirilib və Polşanın ittihamı tam əsaslıdır. Məsələnin mahiyyəti ondadır ki, son günlər Polşa və digər Avropa İttifaqı ölkələrinin hava sərhədləri bu pilotsuz uçuş aparatları ilə pozulub. İranın Rusiyanın işğalçı siyasətinə dəstək verməsi fonunda Polşa rəsmilərinin belə mövqeyi tamamilə təbiidir".
Ekspert İranın İkinci Dünya Müharibəsi dövründə 100 mindən çox polşalıya sığınacaq verməsindən də bəhs edib:
"Bəli, mümkündür, lakin unutmamaq lazımdır ki, həmin dövrdə İran müstəqil siyasət yürütmürdü. O zaman ölkə həm ABŞ, həm də Sovet İttifaqının nəzarəti altında idi. “Lend-Liz” proqramı çərçivəsində ABŞ-dən gətirilən hərbi texnika hissələri İranda yığılır və cəbhəyə göndərilirdi. İranın şimalını Sovet İttifaqı, cənubunu isə ABŞ və Böyük Britaniya nəzarətdə saxlayırdı.
Bu ölkələrin hərbi qüvvələri müharibədən yalnız bir il sonra İranı tərk edərək hakimiyyəti şah rejiminə təhvil vermişdilər. Deməli, həmin dövrdə İranın ölkə daxilində kimləri yerləşdirəcəyi və ya hansı addımı atacağı barədə qərar vermək səlahiyyəti özündə deyildi".
Qiymət Mahir
