Ərdoğandan sonra prezident kim olacaq? – 4 nəfərin adı açıqlandı

“Hurriyet”in köşə yazarı Abdulkadir Selvi yazır ki, Türkiyənin hakim Ədalət və İnkişaf Partiyası daxilində “Ərdoğan sonrası” mövzusu süni qarşıdurma yaratmaq məqsədi daşıyır. Onun fikrincə, hələlik “Ərdoğan sonrası yenə Ərdoğandır”. Bununla belə, müzakirələrdə dörd ad ön plana çıxır: Rəcəb Tayyib Ərdoğanın xarici işlər naziri Hakan Fidan, MİT rəhbəri İbrahim Kalın, oğlu Bilal Erdoğan və “Baykar”ın rəhbəri Selçuk Bayraktar. Ərdoğanın hazırkı səlahiyyət müddəti 2028-ci ildə başa çatır və yenidən namizədliyi açıq sual olaraq qalır. 

Maraqlıdır, bu müzakirələr Türkiyədə siyasi sabitlik üçün risk ola bilərmi?

Sözügedən məsələ ilə bağlı TodayPress TV-yə danışan siyasi analitik Şakir Ağayev bildirib ki,  Ərdoğandan sonra varislik müzakirələri AKP daxilində parçalanma riski yarada bilər: 

"Bəli, bu cür açıqlamalara Türkiyə mətbuatında tez-tez rast gəlinir. Ərdoğandan sonra, yəni onun varisi kim olacaq sualı ətrafında müzakirələr aparılır. Bu kontekstdə Hakan Fidanın, İbrahim Kalının, oğlu Bilal Ərdoğanın və kürəkəni Səlcuq Bayraktarın adları çəkilir.

Hətta belə iddialar da var ki, hakim Ədalət və İnkişaf Partiyası daxilində bu fiqurlar arasında üstünlük məsələsi müəyyən ziddiyyətlər yarada bilər və gələcəkdə partiya daxilində parçalanmaya səbəb ola bilər".

Onun sözlərinə görə, hələlik parçalanma gözlənilmir:

"Lakin hazırkı mərhələdə mən bu müzakirələrin Türkiyədə ciddi siyasi parçalanmaya gətirib çıxaracağını düşünmürəm. Çünki bir neçə gün əvvəl AKP təmsilçiləri açıq şəkildə bəyan etdilər ki, 2028-ci il seçkilərində Ərdoğanın daha yüksək səslə qalib gəlməsi üçün çalışacaqlar. Üstəlik, Prezident Ərdoğan özü hələ seçkidə iştirak edib-etməyəcəyi ilə bağlı mövqeyini açıqlamayıb".

Politoloq qeyd edib ki,  müzakirələr daha çox ictimai rəyi ölçmək üçündür:

"Bu müzakirələr daha çox cəmiyyətin nəbzini yoxlamaq, ictimai reaksiyanı ölçmək və ictimai fikri müəyyən istiqamətə yönəltmək xarakteri daşıya bilər. Yəni söhbət sabah baş verəcək real proseslərdən getmir. Nə Türkiyə Prezidenti, nə də hakim partiya növbədənkənar seçki ehtimalını gündəmə gətirib. Rəsmi mövqeyə görə, seçkilər vaxtında keçiriləcək".

Analitikin fikrincə, həmin müddətədək konstitusiya dəyişikliyi və ya siyasi-hüquqi addımların atılması ehtimalı da tam istisna olunmur. Yalnız bu cür dəyişikliklərdən sonra vəziyyət daha aydın görünə bilər.

Şakir Ağayev sonda vurğulayıb ki, rəsmi addım olarsa, AKP-nin seçimi xalqın mövqeyi ilə bəlli olacaq: 

"Bu gün üçün real addımlar atılmır. Bəli, adı çəkilən şəxslər ictimai rəy baxımından sınaqdan keçirilir, cəmiyyətin onlara münasibəti ölçülür. Amma hazırda bu məsələ hakim partiya üçün ciddi daxili problem hesab edilmir. Əgər rəsmi qərar elan olunarsa, o zaman AKP-nin hansı fiqura daha çox istinad etdiyi aydınlaşacaq. Şübhəsiz ki, bu prosesdə xalqın mövqeyi və ictimai rəy əsas amillərdən biri olacaq". 

Jalə Rövşən

TodayPress TV