Eçmiədzin məğlub oldu: Paşinyan mövqeyini möhkəmləndirir

Ermənistan Baş naziri Nikol Paşinyanın partiyası Eçmiədzin kilsəsinin də yerləşdiyi Vaqarşapatdakı bələdiyyə seçkilərində qalib gəlib. Rəsmi məlumata görə, qalib qüvvə böyüdülmüş icma rəhbərliyində 33 yerdən 19-nu qazanmaqla yerli hökuməti təkbaşına formalaşdıra biləcək.

Səsvermədə ənənəvi radikal-revanşist müxalifət çox az sayda səs alıb. Ancaq daşnaklar istisna olmaqla. Maraqlıdır ki, onlar “İrəli” partiyası ilə koalisiyada səslərin 31.9%-ni əldə edib 2-ci yeri tutublar.

Maraqlıdır, bəs bu uğur Paşinyana nə qazandıracaq?

Politoloq Fəqani Məhərrəmli məsələ ilə bağlı TodayPress TV-yə danışıb.

Onun sözlərinə görə, 44 günlük Vətən müharibəsi və 1 günlük antiterror əməliyyatı erməni cəmiyyətində dərin şok effekti yaradaraq uzun illərin yalan üzərində qurulmuş siyasi və ideoloji təsəvvürlərini dağıtdı:

“Ermənistanda artıq anlayırlar ki, qonşu dövlətlərin torpaqlarını başqa ölkələrin təhriki və dəstəyi ilə işğal etmək, onları özününküləşdirməyə çalışmaq və saxta soyqırım iddiaları ilə başqa dövlətlərin hüquqi ərazilərinə göz dikmək erməni xalqının maraqlarına cavab vermir. Əksinə, bu addımlar onların milli maraqları ilə tam ziddiyyət təşkil edir”.

Ekspert bildirib ki, Ermənistanı uzun illər idarə edən, özlərini “qəhrəman” kimi təqdim edən siyasi qrupların iç üzü müharibədən sonra tam açılıb:

“Erməni cəmiyyətini uzun əsrlər saxta miflərlə kölələşdirən Erməni Kilsəsi də keçmiş “Qarabağ klanı”na dəstək verib, onları imtiyazlarla təmin edib. Vətən müharibəsindən sonra hər iki dini-siyasi güc ifşa olundu və cəmiyyət tərəfindən rədd edildi”.

Fəqani Məhərrəmlinin sözlərinə görə, Ermənistanın Azərbaycana qarşı kapitulyasiyasından sonra keçirilən seçkilər də bu siyasi qüvvələrin cəmiyyətdə nüfuzunun qalmadığını göstərdi:

“Sabiq prezidentlər Robert Köçəryan və Serj Sarkisyan kimi din dəstəkli avantüristlərin siyasi iflası ondan xəbər verir ki, qarşıdan gələn 2026-cı il parlament seçkilərində də bu qruplar məğlubiyyətə uğrayacaqlar”.

Ekspert əlavə edib ki, baş nazir Nikol Paşinyan cəmiyyətin nə istədiyini yaxşı anlayır və dini iyerarxiya ilə siyasi manipulyatorlara qarşı mübarizəsini davam etdirir:

“Son günlərdə, xüsusilə dini nüfuzun yüksək olduğu bölgələrdə yerli özünüidarəetmə orqanlarına keçirilən seçkilərdə Paşinyanın rəhbərlik etdiyi “Vətəndaş müqaviləsi” partiyasının qalib gəlməsi göstərir ki, bu proses davam edəcək”.

Qiymət Mahir

TodayPress TV