Bayru getdi, böhran qapıdadır - Makron üçün SON BAŞLAYIR!
"Böyük ehtimalla, Fransa Prezidenti Emmanuel Makron səlahiyyət müddətini başa çatdırmadan istefa verməyə məcbur olacaq".
Politoloq Elçin Xalidbəyli bunu TodayPress TV-yə açıqlamasında deyib.
O bildirib ki, Emmanuel Makronun hakimiyyəti son illərdə olduqca ağır sınaqlardan keçir:
"Belə ki, bir müddət əvvəl Makron həm öz nüfuzunun, həm də rəhbərlik etdiyi partiyanın cəmiyyətdəki dəstəyinin azalmasını nəzərə aldı və Avropa Parlamentində keçirilən seçkilərdəki məğlubiyyəti əsas gətirərək Fransada növbədənkənar parlament seçkiləri keçirdi. Lakin həmin seçkilərdə də istədiyi nəticəni əldə edə bilmədi. Bunun ardınca, Makrona qarşı impiçment prosesi başlandı və Fransa tarixində ilk dəfə olaraq parlament prezidentə qarşı impiçment müraciətini qəbul edərək icraya yönəltdi. Ümumilikdə isə Makron hakimiyyətinə qarşı aparılan anti-kampaniya prosesi uğurla davam edir və onun siyasi mövqelərini zəiflədir".
"Fransa ciddi aktor kimi qəbul edilmir"
Ekspert əlavə edib ki, Makronun dövründə Fransanın Afrikadakı mövqelərini itirməsi, xüsusilə ucuz xammal mənbələrindən məhrum olması ölkə iqtisadiyyatında ciddi böhrana yol açıb. Bununla yanaşı, Fransanın beynəlxalq nüfuzu da minimum səviyyəyə enib. Rəsmi Paris artıq qlobal proseslərdə ciddi aktor kimi qəbul edilmir.
"Bütün bu amillər Fransa cəmiyyətində Makron hakimiyyətinə qarşı formalaşan mənfi münasibətin əsas səbəblərindəndir. Ən başlıcası hazırda Fransa iqtisadiyyatının çöküş vəziyyətində olmasıdır ki, bu da sosial-iqtisadi şəraitin ağırlaşmasına gətirib çıxarır. Nəticədə sosial narazılıqlar kütləvi siyasi etirazlara çevrilir. Yaz aylarında Fransada yeni güclü etiraz dalğasının baş qaldıracağı gözlənilir", - deyə siyasətçi vurğulayıb.
"Makron istefaya məcbur qalacaq"
E.Xalidbəyli izah edib ki, Makronun növbəti prezident seçkilərinə qədər hakimiyyətdə qalıb-qalmayacağı sual altındadır. Böyük ehtimalla o, ya səlahiyyət müddətini başa çatdırmadan istefa verməyə məcbur olacaq, ya da impiçment prosesi onun vəzifədən uzaqlaşdırılması ilə nəticələnəcək.
Qeyd edək ki, Fransanın Baş naziri Fransua Bayrunun hökuməti doqquz aylıq fəaliyyətdən sonra sentyabrın 9-da istefa verib. Son 20 ayda dördüncü dəfədir ki, Parisdə baş nazir dəyişir.
Xatırladaq ki, sentyabrın 8-də Bayru hökumətinə çağırdığı etimad səsverməsində uduzub. O, sosial ödənişlərin dondurulması və iki milli bayram gününün ləğvini təklif etmişdi.
Prezident Emmanuel Makron Bayrunun istefasını qəbul edib və bir neçə gün ərzində yeni baş nazir təyin edəcəyini bildirib. Lakin ekspertlərə görə, Makronun mərkəzçi düşərgəsindən yeni fiqur seçməsi ölkədə siyasi sabitliyi təmin etmək əvəzinə yeni qarşıdurmalara yol aça bilər.
Qiymət Mahir
FOTOLAR
