Avropa üçün kritik xəbərdarlıq: Gözlər Moskvada

Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov Rusiyanın Avropaya qarşı hücum və təzyiq planlarını çoxdan hazırladığını deyib. Onun sözlərinə görə, Moskvanın məqsədi Avropa cəmiyyətlərini qorxutmaq və bu yolla Ukraynaya dəstəyi azaltmaqdır. Budanov Avropanın müdafiə hazırlığının zəif olduğunu və Rusiya təzyiqinin artacağı halda vəziyyətin daha da pisləşəcəyini bildirib.

Bəs  Rusiyanın Avropaya qarşı genişmiqyaslı hərbi eskalasiyaya getməsi real ssenaridirmi və bu risk hansı zaman çərçivəsində aktuallaşa bilər? 

"Rusiya təhlükəsinin artdığı artıq Avropanın da qəbul etdiyi bir reallıqdır".

Bunu sözügedən məsələ ilə bağlı TodayPress TV -yə açıqlamasında politoloq Elçin Xalidbəyli deyib.

Onun sözlərinə görə,  Moskvanın Avropa ölkələrinə zərbələr endirməsi ehtimalı qətiyyən istisna edilmir:

"Artıq heç kimə sirr deyil ki, Rusiya Avropa dövlətlərinə qarşı hərbi təzyiq niyyətlərini açıq şəkildə ön plana çıxarmağa başlayıb və yaxın gələcəkdə böyük ehtimalla belə zərbələr Ukrayna müharibəsinin başa çatmasından sonra baş verə bilər. Əslində, Ukrayna kəşfiyyatının məlumatı olmasa belə, Avropa ölkələri bu təhlükədən xəbərdardır".

O, qeyd edib ki, Berlinə görə, Rusiya təhlükəsi 2030-dan əvvəl qapını döyə bilər:

"Almaniyanın müdafiə naziri son açıqlamasında Qərbdə səslənən “Rusiya 2030-cu ildən əvvəl hücuma keçməz” proqnozlarının gerçəklikdən uzaq olduğunu bildirib. Onun fikrincə, Moskva 2030-cu ili gözləməyəcək və böyük ehtimalla 2027-ci, ən uzağı isə 2028-ci ilə qədər Avropa ölkələrinə hərbi zərbələr endirməyə başlaya bilər. Bu isə Avropa üçün uzun illərdir davam edən nisbətən sakit dövrün sona çatması ehtimalının çox yaxın olduğunu göstərir".

E. Xalidbəyli həmçinin vurğulayıb ki, Avropa Rusiyaya qarşı müdafiəni Ukraynanı gücləndirməklə mümkün sayır:

"Məhz buna görə də Almaniya bütün Avropa ölkələrinə çağırış edərək onların öz hərbi potensiallarını təcili şəkildə gücləndirməsini tələb edir. Məqsəd, Rusiyanın mümkün təcavüzünə qarşı yetərli müdafiə gücünün formalaşdırılmasıdır. Eyni zamanda Almaniya və Fransa hesab edir ki, Avropanın müdafiəsi üçün indi Ukraynanın daha güclü şəkildə dəstəklənməsi həyati əhəmiyyət daşıyır. Çünki Avropa rəsmilərinin fikrincə, bu gün Ukrayna Rusiya ilə Avropa arasında olduqca mühüm strateji bufer zonası rolunu oynayır və bu zonanın qorunması Avropanın təhlükəsizlik arxitekturasının əsas elementlərindən biridir".

Politoloq sonda əlavə edib ki, beləliklə, Avropa həm Rusiyanın yaxın gələcəyə yönəlmiş hücum planlarından xəbərdardır, həm də Ukraynaya dəstəyin artırılmasının vacibliyini açıq şəkildə etiraf edir. Rusiya təhlükəsi artdıqca, Avropanın Kiyevə dəstək vermək öhdəliyi də bir o qədər güclənir. 

Jalə Rövşən

TodayPress TV